Struktura e Posaçme Anti-Korrupsion (SPAK) në Tiranë, e cila është një nga institucionet më të rëndësishme dhe më të fuqishme në Shqipëri, ka pezulluar nga detyra zëvendëskryeministren dhe ministren e Infrastrukturës Belinda Balluku. Ajo gjithashtu është ndaluar të largohet nga Shqipëria. SPAK dje e akuzoi atë për manipulim të tenderëve në të cilët kompanitë shqiptare “PE-VLA-KU” dhe “Gjoka Construction” shfaqen si kompani, të cilat kanë qenë pjesë e dy aferave të ndara në Maqedoni për dy vitet e fundit, raporton Laboratorit të Gazetarisë Investigative (IRL), transmeton Portalb.mk.
Mbrëmë vonë, SPAK njoftoi zyrtarisht detajet e çështjes, dhe ajo që të dy tenderët kanë të përbashkët është se fituesit ishin rënë dakord paraprakisht.
“E pandehura Belinda Balluku, në bashkëpunim me anëtarët e Komisionit të Vlerësimit të Ofertave, të pandehurit Eviz Berberi, Gentian Gjuli, Erald Elezi, Jetmira Dervishi dhe Mirzeta Kasnica, përcaktuan paraprakisht fituesin e procedurës së prokurimit publik për Tunelin e Llogarës, duke krijuar avantazhe dhe privilegje të padrejta”, thuhet në deklaratën e SPAK.
E njëjta gjë u zbulua edhe në procedurën për ndërtimin e unazës së jashtme numër 4 rreth Tiranës.
“Balluku, në bashkëpunim me të pandehurën Eviz Berberi, anëtarët e Departamentit të Prokurimit Publik, personat, anëtarët e Komisionit të Vlerësimit të Ofertave, përcaktuan paraprakisht fituesin e kësaj procedure prokurimi publik”, thuhet në deklaratën e SPAK.
Në Regjistrin e Prokurimit Publik të Shqipërisë, IRL kontrolloi sot se cilat kompani fituan tenderët dhe zbuloi emrat e “PE-VLA-KU” dhe “Gjoka Construction”.
Kompania “PE-VLA-KU” punoi në bypass-in rreth Tiranës, dhe “Gjoka Construction” në vitin 2021 fitoi punën e shpimit të tunelit nën malin e Llogarës. Ai tani lidh Vlorën dhe bregdetin jugor të Jonit, por tenderi u anulua, dhe kompania shqiptare nuk u ankua.
Pastaj, në një tender të përsëritur po atë vit, një kompani turke fitoi biznesin e tunelit, dhe “Gjoka Construction” u bë nënkontraktor, gjegjësisht gjatë gjithë kohës që kjo kompani po ndërtonte de facto tunelin dhe po merrte miliona euro para shtetërore.
Bizneset në Maqedoni të “PE-VLA-KU” dhe “Gjoka Construction”
Në vitin 2023, IRL njoftoi se një partner i nipit të Ali Ahmetit, Drinit, është një nga pronarët e “PE-VLA-KU”, Vladimir Pjetergjokaj. Kompania shpesh fiton tendera tërheqës shtetërorë për ndërtimin e rrugëve në Shqipëri.
“PE-VLA-KU” ishte një nga dy kompanitë që, së bashku me kompaninë “Thor Industries” të Drin Ahmetit, u bënë pronare të QT SORAVIA në qendër të Shkupit.
IRL atëkohë njofotoi se kompania “PE-VLA-KU” zotëron 2.92% të aksioneve të “Kredins Bank”, bankës së parë private në Shqipëri që u krijua nga privatizimi i bankës shtetërore dhe bankës që do t’i japë hua Drin Ahmetit pa investuar asnjë denar në “Soravia”. Menaxherët e “Kredins Bank”, Monika Milo dhe Maltin Korkuti, janë dy nga disa emra kontrovers bankarë që në të kaluarën u shfaqën edhe si pronarë të resortit “Radika” në Mavrovë, dhe marrëveshjet e këtyre individëve dhe kompanive në Shqipëri u pasuan nga atentate të pazgjidhura.
Dy vjet e gjysmë më parë, nipi i Ali Ahmetit dhe kompania “PE – VLA – KU” e Vladimir Pjetergjokajt, i cili është një nga dy pronarët e saj, u shpjegoi gazetarëve se nuk do të jepnin asnjë euro nga xhepat e tyre për të realizuar transaksionin për blerjen e qendrës së biznesit Soravia. Kredia në emër të tyre u dha nga banka “Kredins” nga Shqipëria.
Bëhej fjalë për rreth gjashtë milionë euro me të cilat Soravia do të zhvillohej dhe ringjallej. Kur gazetarët kuriozë e pyetën Drin Ahmetin se sa nga kredia do të duhej të shlyente ai, si pronar i Thor Industries, ai u përgjigj shkurt se paratë ishin siguruar nga Kredins dhe se nuk po i investonte fare paratë e tij.
Në nëntor 2024, gjatë kohës së ministrit të Shëndetësisë Arben Taravari, Ministria e Shëndetësisë shpalli tender për menaxhimin e parkingut në Qendrën Klinike Nënë Tereza në Shkup. Ideja ishte të futej një partneritet publiko-privat, ku një kompani private do të investonte në infrastrukturë dhe më pas do të menaxhonte parkingun.
Në mars 2025, u njoftua se vetëm kompania shqiptare Gjoka Construction kishte aplikuar për tenderin. Kontrata parashikonte një koncesion 20-vjeçar, me ndërtimin e garazheve dykatëshe dhe menaxhimin e të gjithë parkingut.
Mungesa e konkurrencës ngriti dyshime se ishin vendosur kushtet që biznesi t’i jepej “Gjoka Construction”. Shteti do të merrte vetëm 1% të të ardhurave vjetore, ndërsa sektori privat do të mblidhte miliona euro. Me projektin, tarifa e parkimit do të rritej nga 30 në 50 denarë në orë.
Publiku, media dhe disa parti politike reaguan ashpër në atë kohë, ndërsa Qeveria e kryeministrit Hristijan Mickoski refuzoi të nënshkruante marrëveshjen. Pasi dështoi marrëveshja e partneritetit publik-privat, Arben Taravari u tërhoq shpejt nga koalicioni qeveritar dhe nga pozicioni i ministrit të Shëndetësisë.
Ndryshe, sot, kryeministri shqiptar Edi Rama nuk u përgjigj nëse do ta shkarkonte zëvendëskryeministrin Balluku, por kritikoi autoritetet e SPAK për ndërhyrje në kompetencat e ekzekutivit me vendimin për ta pezulluar atë.
