Kryetari i Kuvendit, Afrim Gashi ka takuar sot kryetarin e Këshillit global për tolerancë dhe paqe, Ahmed Bin Mohamed Aljarwan. Me këtë rast ata kanë nënshkruar Memorandum bashkëpunimi ndërmjet Kuvendit të Republikës së Maqedonisë së Veriut dhe Parlamentit ndërkombëtar për tolerancë dhe paqe (IPTP).
Sipas Gashit, ky është një hap i rëndësishëm për forcimin e pozitës së vendit në proceset globale për tolerancë, dialog dhe paqe.
“Sot së bashku me kryetarin e Këshillit global për tolerancë dhe paqe, z. Ahmed Bin Mohamed Aljarwan, nënshkruam Memorandumin e bashkëpunimit ndërmjet Kuvendit të Republikës së Maqedonisë së Veriut dhe Parlamentit Ndërkombëtar për Tolerancë dhe Paqe (IPTP). Ky memorandum synon të forcojë bashkëpunimin institucional, të mundësojë pjesëmarrje më madhe të Kuvendit tonë në sesionet, komitetet dhe aktivitetet ndërkombëtare të IPTP-së, si dhe të krijojë hapësira të reja për organizimin e ngjarjeve të përbashkëta dhe iniciativave me interes të ndërsjellë. Ky është një hap i rëndësishëm për forcimin e pozitës së Republikës së Maqedonisë së Veriut në proceset globale për tolerancë, dialog dhe paqe”, theksohet në postimin e kryeparlamentarit Gashi në Fejsbuk.
