Zëvendëskryeministri për qeverisje të mirë dhe një nga liderët e VLEN, Arben Fetai ka reaguar pas largimit të Ziadin Selës nga AKI, duke e cilësuar këtë zhvillim si “kapitullin e fundit të një rruge të nisur gabim që në fillim”.
Në një postimi të publikuar në rrjetet sociale, Fetai tha se veprimet e Selës nuk përbëjnë më befasi, pasi sipas tij, “rrugën e hapur nga Sela e shtroi Taravari”, duke i akuzuar të dy se i kanë shërbyer agjendës së kreut të BDI-së, Ali Ahmeti.
Fetai theksoi se votuesi i Aleancës për Shqiptarët ka qenë historikisht kundër BDI-së dhe se tradhtia e këtij pozicioni ka çuar në rënien politike të Selës.
“Sot nuk ka më dilema. Kur tradhton parimet, strukturat dhe votën anti-BDI për t’u bërë pjesë e planeve të Ahmetit e Grubit, fundi është i pashmangshëm: saltoja morale bëhet mortale. Para vetëm dy vitesh, votuesi i Aleancës mori një vendim të qartë si kristali: JO me Ahmetin, JO me Grubin. Këtë e dinin shumë mirë si Taravari, ashtu edhe Sela. Megjithatë, ata tentuan ta merrnin atë votues me vete, ta mashtronin, t’ia thyenin dinjitetin”, shkroi ai.
Duke përmendur 107 mijë votat e koalicionit VLEN dhe marrjen e 10 komunave, zv/kryeministri theksoi se ky rezultat erdhi sepse partia i qëndroi besnike kursit të saj politik që siç shton, “nuk devijuam asnjë milimetër”.
Në fund të deklaratës, Fetai u shpreh se Aleanca për Shqiptarët mbetet e hapur për të gjithë ata që ndihen të tradhtuar nga zhvillimet e fundit.
“E hapur për ata që u mashtruan, që duruan dhe nuk e ulën kokën. Ne ecim drejt. Ne ecim fort. Dhe kjo rrugë nuk ka kthim”, përfundoi ai.
