Sot kryetari i Komunës së Tearcës, Daut Memisbi së bashku me kompaninë që pritet të nisë punimet, inspektuan nga afër gjendjen në terren në rrugën 102, e cila lidh udhëkryqin pranë komunës me urën në “Lumbardh”, që shërben si lidhje mes Tearcës dhe Përshefcës.
Rruga, e cila ka gjatësi prej 946 metrash dhe gjerësi 5 metra, është pjesë e një projekti të financuar nga Banka Botërore dhe të menaxhuar nga Ministria e Transportit. Institucionet përgjegjëse po finalizojnë procedurat dhe dokumentacionin teknik, me qëllim që punimet të nisin në afatin më të shpejtë të mundshëm.
Gjatë inspektimit u konstatua se në periudhat e kaluara nuk janë realizuar daljet nga gypi kryesor i kanalizimit dhe ujësjellësit, ndërhyrje të domosdoshme për kyçjen e amvisërive dhe bizneseve përgjatë kësaj rruge.
Komuna njofton se këto mangësi do të adresohen me prioritet, në mënyrë që projekti të zhvillohet pa pengesa dhe rruga t’u shërbejë banorëve me standardet e duhura.
