Pas raportimit për anulimin e procedurës së tenderimit për fazën e tretë të projektit “Sheshi Skënderbeu” dhe parkingun nëntokësor, ka reaguar zëvendësministrja e Transportit dhe Lidhjeve, ndërsa ka thënë se “nuk bëhet fjalë për anulim të projektit, por për një ndërprerje teknike të procedurës së prokurimit”.
“Lidhur me disa shkrime mediale për gjoja anulimin e procedurës së prokurimit për projektin ‘Sheshi Skënderbeu faza 3, parkingu nëntokësor’, dëshirojmë t’i sqarojmë opinionit publik se bëhet fjalë ekskluzivisht për arsye teknike të vërejtura në dokumentacionin e tenderit. Gjatë verifikimit zyrtar u konstatuan mospërputhje dhe gabime të trashëguara në përllogaritje, të cilat kërkojnë korrigjim para vazhdimit të procedurës, me qëllim sigurimin e transparencës dhe respektimit të plotë të ligjit. Për këtë arsye, është marrë vendimi për anulim teknik të procedurës, që nënkupton përmirësimin e dokumentacionit dhe rihapjen e tenderit”, shkruan në sqarimin e saj zëvendësministrja Zekolli Shaqiri.
Në sqarimin e saj, Zekolli Shaqiri siguron se projekti nuk anulohet, por vetëm procedura e tenderimit.
“Procedura e prokurimit do të hapet sërish në ditët në vijim, ndërsa përmirësimi teknik ka për qëllim vetëm garantimin profesional dhe të qëndrueshëm”, deklaron zëvendësministrja.
