Këshilli i Sigurimit i OKB-së miratoi të hënën rezolutën e hartuar nga SHBA-ja, e cila mbështet planin 20-pikësh të presidentit amerikan, Donald Trump, për Gazën.
Rezoluta u mbështet nga 13 vende, përfshirë Mbretërinë e Bashkuar, Francën dhe Somalinë dhe asnjë nuk votoi kundër propozimit, ndërsa Rusia dhe Kina abstenuan.
Miratimi i saj ishte një “hap i rëndësishëm në konsolidimin e armëpushimit”, tha një zëdhënës i Sekretarit të Përgjithshëm të OKB-së, Antonio Guterres, përcjell A2 CNN.
Në plan përfshihet edhe krijimi i një Force Ndërkombëtare Stabilizimi (ISF), në të cilën, sipas SHBA-së, shumë vende të paidentifikuara janë ofruar të kontribuojnë.
Rezoluta ka për qëllim t’i japë legjitimitet ndërkombëtar planit 20-pikësh të presidentit të SHBA-së Donald Trump për Gazën, pjesë të të cilit formuan bazën e armëpushimit që hyri në fuqi në Rripin e Gazës muajin e kaluar. Shtetet e Bashkuara kishin lobuar fort për miratimin e saj, e cila u vlerësua nga Trump në një postim të gjatë në mediat sociale, shkruan A2 CNN.
“Urime botës për Votën e jashtëzakonshme të Këshillit të Sigurimit të Kombeve të Bashkuara, vetëm pak çaste më parë, duke njohur dhe mbështetur BORDIN E PAQES, i cili do të kryesohet nga unë dhe do të përfshijë udhëheqësit më të fuqishëm dhe më të respektuar në të gjithë botën”, shkroi Trump të hënën.
Hamasi e ka hedhur poshtë rezolutën, duke thënë se ajo nuk përmbush të drejtat dhe kërkesat e palestinezëve.
Duke shkruar në Telegram pas miratimit të rezolutës, Hamasi tha se plani “imponon një mekanizëm ndërkombëtar kujdestarie në Rripin e Gazës, të cilin populli ynë dhe fraksionet e tyre e refuzojnë”.
