Periudha e aplikimit për lotarinë e Kartës së Gjelbër për vitin 2026 fillon më 2 tetor në ora 18:00 dhe përfundon më 5 nëntor 2024 në ora 18:00, sipas njoftimit të Ambasadës së Shteteve të Bashkuara të Amerikës në Maqedoninë e Veriut. Të gjithë personat që i plotësojnë kriteret kanë mundësi të aplikojnë për vizë emigrimi për SHBA.
Ambasada thekson se pjesëmarrja në lotari është plotësisht falas dhe u bën thirrje qytetarëve të kenë kujdes nga mashtrimet. Sipas njoftimit, duhet të ruhen nga personat që pretendojnë se rrisin shanset për përzgjedhje në këmbim të pagesës, apo nga ata që ofrohen të plotësojnë aplikacionin “falas”. Ajo rekomandon që kandidatët të dorëzojnë vetë aplikimet e tyre dhe të ruajnë numrin unik, i cili është i domosdoshëm për të kontrolluar rezultatet në maj 2025.
Ambasada thekson se mënyra e vetme zyrtare për të aplikuar është përmes dvprogram.state.gov, ndërsa para aplikimit këshillohet që të lexohen me kujdes udhëzimet në travel.state.gov/dv.
Kandidatët duhet të dorëzojnë vetëm një aplikim dhe të përfshijnë bashkëshortin/ën dhe fëmijët e pamartuar nën 21 vjeç, edhe nëse ata nuk do të udhëtojnë me aplikuesin. Secili kandidat duhet të printojë dhe ruajë faqen e konfirmimit dhe numrin unik deri më 30 shtator 2026, pavarësisht nëse përzgjidhet apo jo, pasi ky është i vetmi mjet për të kontrolluar statusin e përzgjedhjes.
