Kryeministrin shqiptar Edi Rama e pritën me tortë në Bruksel për të shënuar hapjen e kapitullit të fundit të Shqipërisë, për integrim në BE. Në konferencën për shtyp me komisioneren për zgjerim Marta Kos dhe ministren e Jashtme të Danimarkës Marie Bjerre, kryeministri shqiptar Edi Rama tha se deri në vitin 2027 Shqipëria do të ketë mbyllur të gjithë grupkapitujt.
“Do të bëjmë gjithçka që kemi në dorë për të ecur përpara me të njëjtin intensitet, me të njëjtën disiplinë dhe me të njëjtën punë të madhe, për të dhënë rezultate dhe për t’u siguruar që ky proces i përbashkët që po e ndërtojmë me partnerët tanë këtu në Bruksel dhe me partnerët tanë në shtetet anëtare, të mos ndalet”, tha Edi Rama, Kryeministër i Shqipërisë.
Komisionarja Kos, e vlerësoi punën e bërë nga Shqipëria, e cila, sipas saj, solli hapjen e grupkapitujve të fundit.
“Ky sukses nuk do ishte i mundur pa angazhimin e Shqipërisë dhe mbështetjen e gjithë shteteve anëtare për të mbështetur Shqipërinë. Jemi të përkushtuar ta sjellim Shqipërinë në BE, suksesi është i Shqipërisë, rezultat i punës së autoriteteve për zbatimin e reformave të rëndësishme. Ky është rezultat i qytetarëve shqiptarë që kërkojnë ndryshim dhe i mbështesin këto ndryshime. Shqipëria është shembulli më i mirë i fuqisë transformuese të zgjerimit. Kur jepni rezultate, ecni përpara. Jeni frymëzim për Ballkanin Perëndimor”, deklaroi Marta Kos, Komisionare për zgjerim e BE-së.
Marie Bjerre, ministrja e Jashtme e Danimarkës, tha se nëse Shqipëria vazhdon me këtë ritëm, do të jetë shumë shpejt anëtare e Bashkimit Europian.
“Zgjerimi është përparësi e presidencës daneze. Sot ne po japim një tjetër rezultat. Nëse Shqipëria vazhdon të njëjtin drejtim, me të njëjtin ritëm, anëtarësimi do arrihet në një të ardhme të afërt”, u shpreh Marie Bjerre, Ministre e Jashtme e Danimarkës.
Shqipëria mori statusin e vendit kandidat për anëtarësim në BE në vitin 2014, ndërsa negociatat për anëtarësim i nisi zyrtarisht në vitin 2022. Konferenca e sotme shënoi përmbylljen e ciklit të hapjes së gjashtë grupkapitujve dhe pritet t’i hapë rrugë finalizimit të procesit teknik deri në vitin 2027. Pas kësaj faze, Shqipëria do të kalojë në procesin politik të integrimit, i cili kërkon miratimin e anëtarësimit nga parlamentet e të 27 vendeve anëtare të BE-së. /Alsat.mk
