Nga ditët e ardhshme, çdo person që jeton në territorin e Qytetit të Shkupit do të duhet të kujdeset në cilën kohë i hedh mbeturinat. Hedhja e tyre pas orës 22:00 deri në 6:00 të mëngjesit do të kushtojë 50 euro gjobë. Nga Qyteti i Shkupit thonë se fillimisht do të fillojnë me vërejtje për një periudhë të caktuar, deri në informimin e plotë të qytetarëve. Më pas do të vijë periudha e shqiptimit të gjobave, të cilat do të sillen nga 50 euro për personat fizikë dhe 1800 euro për bizneset, ndërsa gjoba mund të jetë edhe më e lartë për bizneset, varësisht nga lloji i mbeturinës.
Qytetarët kanë mendime të ndara për këtë masë. Një pjesë mendojnë se ky vendim do të sjellë rregull, ndërsa të tjerët thonë se këto janë vendime joefikase.
Anketë me qytetarë
“Po është mirë, për të gjithë njerëzit, jo vetëm për ne, për të gjithë qytetarët.”
“Këto janë vetëm përralla, kur duhet t’i hedhim pra mbeturinat?”
“Është mirë edhe kjo, natën i hedh ku të duash, çfarë të duash hedh. Ditën tashmë dihet, nga ora gjashtë e tutje kanë të drejtë të hedhin e jo natën. Të jetë pak me rregull. Mendoni se është e mirë kjo ndalesë? – po është e mirë, pse të mos jetë. Nuk ke pasur kohë tërë ditën t’i hedhësh pastaj t’i hedhësh ku të duash, nuk bën”.
“Nuk mendoj se do të sjellë rregull, por le të provohet të shohim si do të jetë.”
Drejtori në largim i Higjienës Komunale, Dragi Mitkovski, për televizionin Alsat, thotë se një nga arsyet për marrjen e këtij vendimi është fakti që objektet gastronomike, të cilave u përfundon orari i punës pas orës 22:00, hedhin sasi të mëdha të mbeturinave të ndryshme brenda dhe jashtë kontejnerëve, duke krijuar mini-deponi të egra.
“Qytetarët nuk kanë arsye të shqetësohen për marrjen e këtij vendimi, sepse vetëm një pjesë e vogël prej tyre hedhin mbeturina pas orës 22:00. Vendimi për ndalimin e hedhjes së mbeturinave pas orës 22:00 është marrë sepse një numër i madh i subjekteve juridike, pra objekte gastronomike, pas përfundimit të orarit të tyre të punës — rreth orës 23 ose 00:00 në kontejnerët e dedikuar për qytetarët hedhin sasi të mëdha të mbeturinave të ndryshme, duke i mbushur dhe duke krijuar mini-deponi përreth tyre. Për më tepër, kemi pasur raste kur disa qytetarë, gjatë renovimit të banesave të tyre, kanë hedhur mbeturina të forta ndërtimore me beton në kontejnerë, duke i dëmtuar, thyer dhe prishur edhe kamionët. Në proces është marrja e një vendimi të ri me të cilin të gjitha subjektet juridike do të kenë kontejnerët e tyre, dhe do të rregullohet mënyra e hedhjes së mbeturinave, në mënyrë që të mos përdorin enët e defikuara për qytetarët”, tha Dragi Mitkovski – Drejtor i Higjienës Komunale – Qyteti i Shkupit.
Gjobat do t’i shkruajnë inspektorët e higjienës komunale të Qytetit të Shkupit, si dhe inspektorët komunal./Alsat.mk
