Deputeti i BDI-së, Blerim Bexheti, kundërshton kallëzimin e Policisë Financiare të ngritur ndaj tij për krim ndërtimor, përderisa ka administruar me Komunën e Sarajit. Bexheti e cilëson si persekutim, i motivuar politikisht, i dirigjuar nga kryeministri Mickoski pa asnjë bazë ligjore.
Qëllimi, sipas tij, është i qartë për t’i ushtruar presion që ai t’i bashkohet shumicës parlamentare.
“Sot u them publikisht atyre se as unë dhe as ndonjë deputet tjetër i BDI-së nuk ka frikë nga këto konstruksione dhe nuk do t’i nënshtrohet presionit nga Qeveria. Kallëzimi penal i ngritur nga Policia Financiare është tërësisht i pabazuar dhe për këtë arsye ne do të ngremë procedura përkatëse kundër drejtorit Sllobodan Ivanovski dhe zëvendësdrejtorit Ylber Imeri, si dhe dy personave të tjerë që së bashku si një bandë e organizuar po implementojnë këtë orkestrim të persekutimit politik.”, – theksoi deputeti i BDI-së, Blerim Bexheti.
Plani detal urbanistik, sipas Bexhetit, është miratuar në kohën kur ai ka menaxhuar me komunën, ndërkaq kryetar i qytetit të Shkupit ka qenë nga radhët e VMRO – DPMNE-së.
Përpos deputetit Bexheti, në padinë e një dite më parë të Drejtorisë së Policisë Financiare janë përfshirë edhe shtatë persona të tjerë fizikë, nëpunës në Komunën e Sarajit dhe në Qytetin e Shkupit, si dhe ndaj një inxhinieri mbikëqyrës.
Ata dyshohet se kanë keqpërdorur pozitën zyrtare, kanë punuar në mënyrë të pandërgjegjshme dhe kanë falsifikuar dhe shkatërruar libra afariste. Të dyshuarit, kompaninë nga fshati Gllumovë në Saraj e kanë pasuruar kundërligjshëm për rreth 1.8 milion euro.
