Shkurtim i mjeteve joproduktive, investime në Ndërmarrjet Publike në drejtim të përmirësimit të kushteve të punës, me shumë mjete në investimet kapitale, këto ishin disa nga premtimet të cilat para Këshillit të Qytetit të Shkupit i bëri kryetari i ri, Orce Gjorgjievski, gjatë fjalimit të tij në seancën e dytë të Këshillit, ku në rend të ditës ishte miratimi i ribalancit të buxhetit për këtë vit.
Sipas kryetarit Gjorgjievskit, do të sigurohen mjete për sistemin BRT, por edhe për dekorimin e metropolit për festat e Vitin e Ri, ku sipas përllogaritjes janë paraparë të shpenzohen diku mbi 70 mijë euro.
“Fillimisht kemi bërë uljen e deficitit buxhetor për 928.5 milionë denarë dhe nuk do të lejojmë futje në borxhe të reja. Po ashtu në vend të shpenzimeve joracionale, po rrisim mjetet për investimet kapitale. Shërbimet e transportit Publik do të zgjidhet, sepse këtë e ka marrë për sipër Qeveria dhe Ministria e Transportit, të cilët kanë filluar procedurë për sjelljen e 80 autobusëve të rinj ekologjikë. Kur jemi tek bllok-dotacionet, vitin e kaluar kemi dështuar me plotë 85 milionë denarë, ndërsa këtë vit do të ofrojmë pajisje për shkollat e mesme. Po ashtu mbledhja e tatimit është në nivel shumë të ulët, prandaj edhe do të vendosim mënyrën digjitale, me qëllim që ta përshpejtojnë mbledhjen e tatimeve.”, – deklaroi kryetari i Qytetit të Shkupit, Orce Gjorgjievski.
Kryetari Gjorgjievski, po ashtu theksoi se gjendja me buxhetin e Qytetit të Shkupit është më shumë se alarmante.
Sipas tij, borxhi i Qytetit të Shkupit është mbi 135 milionë euro, qyteti ka kredi rreth 80 milionë euro. Ndërsa nga ana tjetër, sipas tij, Ndërmarrjet Publike kanë një borxh komulativ prej 180 milionë eurove apo rreth 300 milionë euro borxh kanë Ndërmarrjet dhe Qyteti i Shkupit.
Grupi i këshilltarëve të LSDM-së dhe të AKI-së kanë mbështetur këtë propozim dhe kanë vepruar në mënyrë racionale.
Buxheti i Qytetit të Shkupit para ribalancit arrinte pak mbi 144 milionë euro, ndërsa me ribalancin për këtë vit arrin në 129 milionë euro.
