Në seancën e Këshillit të sapozgjedhur të Qytetit të Shkupit u shqyrtua ribalanci i buxhetit për këtë vit. Sipas paralajmërimeve, pritet të sigurohen fonde për sistemin e BRT-së, por edhe – siç ka njoftuar kryetari Gjorgjievski – për zbukurimin e kryeqytetit për festat e fundvitit.
Kryetari tha se në programin fillestar nuk ishin paraparë mjete për zbukurimet para-vitit të ri, e as për organizimin e pritjes së ndërrimit të moteve ashtu siç e meritojnë qytetarët.
Nga grupi i këshilltarëve të LSDM-së theksojnë se do të veprojnë në mënyrë racionale dhe të përgjegjshme dhe se do ta mbështesin ribalancin. Sipas tyre, kjo nuk nënkupton pajtim me politikat e pushtetit lokal, por është nevojë për të siguruar funksionimin e pandërprerë të ndërmarrjeve publike dhe për të mbrojtur qytetarët dhe të punësuarit.
Buxheti i Qytetit të Shkupit për këtë vit kap vlerën e 107 milionë eurove.
