Deputeti i VLEN, Adnan Azizi në “Debat 21” në TV21 ka thënë se për momentin bisedohet me disa deputetë të AKI-së për t’u bërë pjesë e shumicës parlamentare.
“Për momentin nuk bisedohet me X subjekte, por kemi bisedime me deputetë që janë të zhgënjyer nga AKI dhe me ato do ta finalizojmë, një hap konkret që të jenë pjesë e qeverisë”, thotë Azizi.
Ai thotë se bisedohet me 3- 4 prej tyre, me 3 ka zhvilluar biseda personalisht dhe ka një gatishmëri që të jenë pjesë e shumicës dhe secili ka një link komunikimi. “Ne presim epilog edhe në zgjedhjet në Gostivar dhe Vrapçisht dhe të ketë zgjerim të shumicë parlamentare”, tha Azizi.
Ai thekson se kur kemi biseduar dhe ndërtuar qeverinë bashkë me VMRO-në, këtë e kanë ndërtuar mbi disa parime.
“Shqiptarët kanë nja adresë që i përfaqëson ato dhe ajo është VLEN”, tha Azizi.
Nuk ka arsye që Durmishi e Aliu të vihen në pikëpyetje
Lidhur më zërat për rikonstruim, ndërsa u përmendën emrat e Besar Durmishit dhe Azir Aliut, dy ministra nga VLEN, Azizi tha se nuk ka arsye të vihet në pikëpyetje.
“Nuk ka ndonjë arsye që Besar Durmishi të vihet në pikëpyetje, poashtu edhe për Azir Aliun që është vetëm disa muaj në krye të Shëndetësisë. Këto hyjnë në sferën e spekulimeve.
Qeveria është me kapacitet të plotë dhe në shërbim të qytetarëve. Mandatari e ka fjalën e fundit për të bërë emërimet dhe shkarkimet në aspekt teknik, por çdo gjë shkon në partneritet dhe harmoni të plotë”, tha ai.
Ai tha se për momentin nuk ka arrit ndonjë kërkesë që PDSH e Menduh Thaçit të jetë pjesë e koalicionit.
