Policia Kufitare e Kakavijës ka njoftuar se ditën e hënë, më 27 tetor 2025, duke nisur nga ora 06:00 deri në orën 10:00, me orën shqiptare, nuk do të lejohet qarkullimi i mjeteve në pikën e kalimit kufitar Kakavijë, për shkak të një greve të doganierëve grekë.
Sipas informacionit të marrë nëpërmjet qendrës së përbashkët të shkëmbimit të të dhënave mes autoriteteve shqiptare dhe greke, gjatë kësaj periudhe kufiri do të jetë i mbyllur për automjete, ndërsa do të lejohen vetëm këmbësorët pa bagazhe dhe automjetet me emergjenca shëndetësore.
Policia Kufitare Kakavijë kërkon mirëkuptimin e qytetarëve dhe i këshillon udhëtarët që planifikojnë të kalojnë kufirin me automjete, që të shtyjnë udhëtimet për orare të tjera të ditës, për të shmangur pritjet apo vonesat.
Autoritetet shqiptare janë në kontakt të vazhdueshëm me palën greke për të siguruar që lëvizja në kufi të rikthehet normalisht menjëherë pas përfundimit të grevës.
“Policia Kufitare Kakavijë, nëpërmjet qendrës së përbashkët të shkëmbimit të informacionit Kakavijë, është njoftuar nga Policia Kufitare Greke se më datë 27.10.2025, nga ora 06:00 deri në orën 10:00 (me orën shqiptare), në PKK Kakavijë nuk do të lejohet lëvizja e mjeteve, për shkak të grevës së doganierëve.
Do të lejohen të qarkullojnë vetëm këmbësorët pa bagazhe dhe automjetet që do të kenë emergjenca shëndetësore.
Policia Kufitare Kakavijë kërkon mirëkuptimin e qytetarëve dhe sugjeron planifikimin e udhëtimeve me automjete në orare të tjera të ditës”, thuhet në njoftimin e plotë./vizionplus.tv
