Koalicioni VLEN ka konfirmuar se Bekim Sali do të marrë postin e zëvendëskryeministrit të parë, pavarësisht se kryeministri Hristijan Mickoski mohoi se ka marrëveshje për këtë emërim.
Përfaqësuesi i VLEN-it, Driton Sulejmani, tha për Alsat se vendimi është “çështje e kryer” dhe se mbetet vetëm të dakordohen detajet me kryeministrin.
“VLEN pas këtyre zgjedhjeve është partia e dytë me fuqi politike në shtetin tonë. Pozita e zv/kryeministrit të parë e zotëri Mexhitit mbetet vakante, dhe ajo që do të jetë zv/kryeministër i parë është çështje e kryer. Detajet për resorin e zotëri Salit do të dakordohen në takimin e ardhshëm me kryeministrin Mickoski”, tha për Alsat, Sulejmani nga VLEN.
Një ditë më parë, Mickoski kishte deklaruar se ende nuk ka marrëveshje për emërimin e Bekim Salit, duke theksuar se “fjalën e fundit e ka mandatarit”.
Bekim Sali, që vjen nga partia Alternativa brenda koalicionit VLEN, përmendet prej më shumë se dy muajsh si pasardhës i Izet Mexhitit në këtë pozitë. Megjithatë, në kuadër të rikonstruimit të Qeverisë, VLEN duhet të vendosë nëse Sali do të marrë edhe një post ministror, pasi sipas Mickoskit “nuk do të ketë dikastere shtesë për VLEN-in”.
