Në komunën e Çairit ka nisur një aksion i madh pastrimi, i cili po zhvillohet gjatë orëve të vona të mbrëmjes në rrugën Ferid Murati dhe në shumë lokacione të tjera brenda territorit të Shkupit. Kryetari i Komunës së Çairit, Izet Mexhiti, i cili ndodhet në terren, ka deklaruar se ky është një operacion i koordinuar me të gjitha ndërmarrjet publike të qytetit të Shkupit.
Sipas Mexhitit, në aksion janë të angazhuara ndërmarrjet e higjienës komunale, ujësjellësi, parqet dhe shumë sektorë të tjerë, si dhe punëtorë sezonal të Komunës së Çairit. Në operacion janë përfshirë rreth 200 mjete dhe kamionë, jo vetëm nga Shkupi, por edhe nga komuna të tjera si Tetova dhe Strumica.
“Kjo është një ndërhyrje gjenerale për pastrimin e tërësishëm të qytetit të Shkupit,” tha Mexhiti, duke theksuar se po punohet intensivisht në dhjetëra pika njëkohësisht. Ai bëri të ditur se objektivi është që brenda tre ditëve qyteti të pastrohet plotësisht dhe të rikthehet normaliteti.
Kryetari publikisht falënderoi punëtorët për angazhimin e tyre, duke theksuar se ata po japin maksimumin për të përmirësuar gjendjen dhe për të shmangur rrezikun e ndotjes dhe pasojave për shëndetin e qytetarëve.
“Po punojmë edhe natën që Shkupi dhe Çairi të kthehen në gjendje normale. Falënderoj të gjithë punëtorët e ndërmarrjeve publike për përkushtimin e tyre,” deklaroi ai.
Aksioni pritet të vazhdojë edhe ditët në vijim, deri në rikthimin e higjienës dhe pastërtisë në qytet.
