Komisioni Evropian e publikoi Raportin Vjetor për përparimin e vendit në procesin e anëtarësimit në Bashkimin Evropian.
Raporti nuk është vlerësim për një vit të vetëm apo për një qeveri, por për vazhdimësinë e proceseve reformuese, nivelin e pjekurisë institucionale dhe mënyrën se si vendi i përgjigjet prioriteteve afatgjata evropiane.
Ajo që është më e rëndësishme të thuhet në fillim është se Qeveria mbetet 100% e harmonizuar me politikën e jashtme të përbashkët dhe të sigurisë të Bashkimit Evropian, gjë që paraqet një përfitim të rëndësishëm për karakterin e marrëdhënieve tona të ndërsjella dhe për nivelin e përkushtimit tonë ndaj vlerave evropiane.
Në raport theksohet se në disa fusha ekziston “përparim i caktuar” ose “përparim i kufizuar”. Konkretisht, nuk ka fusha ku ka kthim prapa, ndërsa në katër kapituj është shënuar “përparim i mirë”. Në një kapitull, “Lëvizja e lirë e kapitalit”, madje është rritur niveli i përgatitjes, falë anëtarësimit në SEPA dhe zbatimit të masave kundër larjes së parave dhe financimit të terrorizmit.
Komisioni i përshëndet hapat e ndërmarra në pjesën e ekonomisë, me një sektor stabil bankar, rritje të moderuar të BPV-së, miratim të Ligjit për kontroll të brendshëm publik dhe emërimin e anëtarëve të Këshillit Fiskal, masa që forcojnë disiplinën fiskale dhe transparencën.
Vlerësime pozitive ka edhe për digjitalizimin, modernizimin e administratës publike, vendosjen e sistemeve për prokurime elektronike dhe forcimin e sigurisë kibernetike.
Është shënuar përparim edhe në arsim, shkencë dhe politikat rinore, veçanërisht përmes pjesëmarrjes së rritur në programet Horizon Europe dhe COST.
Në fushën e infrastrukturës, Komisioni Evropian i evidenton aktivitetet e mëdha rreth Korridorit VIII, rrjetit TEN-T dhe Ligjit të ri për energji, i cili hap rrugë për tranzicion të gjelbër dhe të drejtë.
Vazhdimisht e përmirëson përgatitjen në fushën e lirisë së shprehjes dhe lirisë së mediave. E rëndësishme është të theksohet se është arritur përparim real në segmente kyçe të rregullimit mediatik dhe pavarësisë institucionale.
Veçanërisht për pavarësinë financiare të Agjencisë për shërbime audio dhe audiovizuale mediatike, e cila është forcuar dhe paraqet një hap të rëndësishëm drejt funksionimit transparent dhe profesional të mediave. Për më tepër, zgjedhja e anëtarëve të rinj të Këshillit të ASHAAM-it nga ana e Kuvendit e konfirmon përkushtimin për proces demokratik dhe stabilitet institucional.
Këto hapa kontribuojnë në forcimin e interesit publik.
Sa i përket kuadrit ligjor edhe pse nevojiten harmonizime të mëtejshme me legjislacionin evropian, veçanërisht me Aktin Evropian për Lirinë e Medias (EMFA), mbi të cilat do të punojmë në periudhën e ardhshme, tashmë janë ndërmarrë hapa konkretë në Ligjin për mediat. Ky është tregues se si Qeveri punojmë aktivisht në afrimin drejt standardeve evropiane dhe në krijimin e një kornize ligjore që garanton lirinë e mediave dhe pluralizmin.
Kuptohet, raporti thekson edhe sfida të cilat shteti duhet t’i adresojë me dinamikë akoma më të fortë.
Sfida ekzistojnë në pjesën e sundimit të ligjit, pavarësisë së gjyqësorit dhe luftës kundër korrupsionit. Polarizimi politik dhe mungesa e bashkëpunimit të mjaftueshëm mes institucioneve mbeten pengesa që e ngadalësojnë zbatimin e reformave.
Kjo Qeveri jo vetëm që është e vetëdijshme për këto sfida, por tashmë po punon në tejkalimin e tyre.
Janë vendosur prioritete të reja për reformën e gjyqësorit, rritjen e përgjegjësisë dhe vendosjen e kritereve të qarta për vlerësimin e gjyqtarëve dhe prokurorëve publik.
Në pjesën e antikorrupsionit, procesi i digjitalizimit të plotë të prokurimeve publike dhe transparencës së shpenzimeve buxhetore do të vazhdojë në vitin 2026.
Sa i përket administratës publike, Qeveria është e vendosur t’i japë fund modelit shumëvjeçar të partizimit dhe të vendosë një sistem në të cilin kompetenca dhe profesionalizmi do të jenë kriteret e vetme për avancim.
Paralelisht, vazhdojnë edhe aktivitetet për përmirësimin e kushteve në burgjet, për avancimin e të drejtave të njeriut dhe integrimin social të kategorive të cenueshme.
Zonja dhe zotërinj,
Si Qeveri mbetemi plotësisht të përkushtuar drejtë rrugës evropiane dhe ndaj reformave që e bëjnë shtetin më të fortë, më funksional dhe më të drejtë.
Do t’i adresojmë të gjitha fushat ku është vërejtur ngecje, me masa konkrete, afate të qarta dhe llogaridhënie.
Qëllimi ynë është anëtarësim i plotë në Bashkimin Evropian.
