Barcelona do të udhëtojë drejt “Santiago Bernabéu” për El Clásico-n e parë të sezonit pa trajnerin Hansi Flick në pankinë. Gjermani do të mungojë për shkak të një pezullimi, dhe në vend të tij ekipin do ta drejtojë asistenti Marcus Sorg.
Sorg doli sot para mediave në konferencën zyrtare të Barcelonës, në prag të ndeshjes ndaj Real Madridit. Flick u përjashtua me karton të kuq javën e kaluar në fitoren ndaj Gironës, dhe megjithëse klubi katalanas e apeloi vendimin tri herë, të gjitha ankesat u refuzuan. Zëvendësi i Flick-ut pranoi se mungesa e tij do të ndihet në përballjen e madhe.
Karriera dhe përvoja e Marcus Sorg
Marcus Sorg, 59 vjeç, ka pasur një karrierë 15-vjeçare si sulmues në ligat e ulëta gjermane, përpara se të tërhiqej nga futbolli aktiv në vitin 1999. Pas tërheqjes, ai mori drejtimin e klubit Ulm, më pas u bashkua me Freiburg si trajner i grupmoshave të reja dhe për një periudhë katërmujore në vitin 2011 drejtoi edhe ekipin e parë. Më vonë punoi në akademinë e Bayern Munich, ku fitoi përvojë të madhe, dhe në vitin 2013 mori drejtimin e kombëtares gjermane U19.
Në vitin 2014, Sorg fitoi Kampionatin Europian U19, ndërsa në vitin 2016 u bë pjesë e stafit teknik të kombëtares A të Gjermanisë. Kur Hansi Flick u shkarkua nga drejtimi i “pancerave” në vitin 2023, Sorg e ndoqi atë në dalje.
Stili dhe personaliteti
Sipas të përditshmes Diario AS, Marcus Sorg njihet si një person me profil të ulët, shumë i kujdesshëm me fjalët, besnik dhe vetëkritik në analizën e ndeshjeve. Ai ka marrëdhënie shumë të mira me lojtarët dhe fiton shpejt besimin e tyre.
“Marcus është trajner shumë i kujdesshëm dhe i detajuar. Vlerësohet shumë sepse çdo seancë stërvitore me të është mësim i ri. Përveç aftësive të tij të jashtëzakonshme taktike, kjo e bën atë të veçantë,” – tha mesfushori i Bayern Munich, Leon Goretzka, për AS.
Edhe pse nuk flet rrjedhshëm spanjisht, Sorg ka mësuar disa shprehje gjatë një praktike dy mujore në Buenos Aires me klubin Argentinos Juniors në vitin 2008. Ai është përshkruar si njeri i rezervuar dhe i qetë, megjithëse sezonin e kaluar pati një përplasje të vogël me Carlo Ancelottin.
I diplomuar në inxhinieri, Sorg i kushton rëndësi të madhe disiplinës në fushë, por gjithmonë duke e kombinuar me një stil sulmues — filozofi që shihet edhe te Barcelona e Flick-ut. Në disa raste, ai ka ndjekur modën e re të trajnerëve, si Luis Enrique, duke parë ndeshjet nga tribunat për një perspektivë më të qartë taktike.
I konsideruar si një ndikim i rëndësishëm për Joshua Kimmich, Sorg ka theksuar shpesh se i pëlqen puna me lojtarë të rinj, të cilët kanë “shpejtësi, uri dhe aftësi teknike” — tri cilësitë që ai beson se përbëjnë themelin e futbollit modern.
