Pas zgjedhjeve lokale të 19 tetorit, përbërja e re e Këshillit Komunal të Tetovës do të jetë si më poshtë: VLEN me 13 këshilltarë, AKI me 12, VMRO-DPMNE me 3, e Majta me 1, LSDM me 1 dhe MMT me 1. Këshilli ka gjithsej 31 këshilltarë. Në katër vitet e fundit, koalicioni VLEN me VMRO-në dhe Alternativën kishte 17 këshilltarë.
Në garën për kryetar komune, Bilall Kasami nga VLEN kryeson në Tetovë, duke siguruar një epërsi të qartë ndaj kundërshtarit nga AKI, Bajram Rexhepi. Në komunat e tjera, VLEN ka fituar Çairin me Izet Mexhitin, Haraçinën me Daut Beqirin, Sarajin me Muhamet Elmazin, Zhelinën me Blerim Sejdiun dhe Tearcën me Daut Memishin.
AKI ka shënuar fitore në Likovë me Erkan Arifin dhe në Pllasnicë me Alija Jaoskin, ndërsa në Vrapçishtë dhe Gostivar do të ketë përsëritje të zgjedhjeve për shkak të mungesës së cenzusit. Suat Shaqiri nga AKI ka fituar në Çashkë, ku VLEN nuk garoi, duke përgëzuar kandidatin për ruajtjen e fitores shqiptare.
