Zëvendëskryeministri Arben Fetai njëherazi një nga Lideret e VLEN, ka reaguar pas zgjedhjeve lokale të së dielës në Maqedoninë e Veriut, duke komentuar rezultatin e dobët të Aleancës për Shqiptarët (ASH) që garoi jashtë koalicionit VLEN.
Në një postim në rrjetet sociale, Fetai ka akuzuar Arben Taravarin dhe Ziadin Selën për “tradhti” ndaj strukturës së partisë, duke thënë se zgjedhësit nuk e toleruan këtë veprim dhe i ndëshkuan me votë.
“Siç pritej, Taravari dhe Sela u barazuan me hiç, pasi struktura e ASH qëndroi në VLEN dhe votuesi jonë nuk e toleroi tradhtinë”, shkroi Fetai.
Ai shtoi se Taravari, që sipas tij synonte të fitonte gjashtë komuna, nuk arriti të sigurojë asnjë, dhe për këtë arsye duhet të jepte dorëheqje.
“Me pas qenë pak burrë, Taravari do jepte dorëheqje qysh mbrëmë sepse nga 6 komuna sa synonte, ra në hiç”, theksoi ai.
Për Ziadin Selën, Fetai u shpreh se “nuk ka as burrëri e as nga çka dorëhiqet”, duke shtuar se tashmë edhe ai “e ka të qartë se kush është hiçi”.
