Bartësi i listës së VLEN për Tetovën, Albi Qamili në tubimin qendror në Tetovë tha se nga këtu sonte do hapin kapitullin e dytë për këtë qytet.
“Dy ditë para zgjedhjeve, kërkoj mbështetje për të rinjtë, kërkoj votë dhe mbështetje edhe për ata që u larguan, beteja jonë nuk është vetëm për ne që jemi këtu, por edhe për ata që nuk janë me ne dhe e duan vendlindjen më shumë se ne”, tha Qamili.
Ai vazhdoi duke thënë se jemi me një zë se Tetova nuk e do erësirën dhe stagnimin.
“Tetova e do zhvillimin, Tetova e do Bilall Kasamin. Jemi këtu për të thënë me një zë se nuk do ta lëmë Tetovën pa Bilallin as nuk do ta lëmë Bilallin pa Tetovën, sepse Bilalli me Tetovën, shkruan histori suksesi”, ka thënë Qamili.
Ai ka edhe një mesazh për votuesit e BDI-së.
“I nderuar votues i BDI-së: Po ta lë në ndërgjegjen tënde, por edhe ti e di shumë mirë se votën tënde e meriton Bilall Kasami sepse nuk ka opsion më të mirë, sepse vota për të është votë për Tetovën. Të dielën votojmë për Bilall Kasamin duke rrethuar numrin 7”, ka thënë mes tjerash Qamili.
