Kryetari i Tetovës Bilall Kasami, në një intervistë për Alsat, ka deklaruar se gjatë mandatit të tij ka arritur të ulë ndjeshëm borxhin e komunës, nga 24 milionë euro në rreth 15 milionë euro.
Kasami tha se me mjetet që ka paguar borxhin e paraardhësve të tij, do të realizonte programin e mandatit të parë deri në fund.
“Kur kam marrë drejtimin e komunës, Tetova ka qenë e zhytur në borxhe. Vetëm për shlyerjen e borxheve të paraardhësve kemi shpenzuar mjete me të cilat do të mund të realizonim 100% programin tonë qeverisës. Megjithatë, sot Tetova është më e pastër, më e zhvilluar dhe me më pak borxhe,” theksoi Kasami.
Ai gjithashtu nënvizoi se projektet zhvillimore nuk do të ndalen dhe një nga prioritetet kryesore mbetet ndërtimi i stadiumit të ri të qytetit.
“Stadiumi i Tetovës është projekt i madh. Ky është një premtim që do të realizohet, sepse qyteti ynë meriton kushte moderne sportive”, tha Kasami.
