Kandidati për kryetar të Komunës së Çairit nga koalicioni VLEN, Izet
Mexhiti, vizitoi konakun e familjes së nderuar të Sherif Elezit në
lagjen Çair i Vjetër. Gjatë vizitës, ai diskutoi drejtpërdrejt me të
pranishmit për pritjet e tyre, nevojat konkrete të zonës dhe investimet
që po realizohen për të përmirësuar infrastrukturën dhe jetesën në
komunë.
Mexhiti theksoi se rrugët po rregullohen, ndërtesat do të pajisen me
ashensorë, ndërtohen shkolla, çerdhe dhe kampusi i UNT-së, duke u
angazhuar që çdo projekt të shërbejë për mirëqenien e banorëve.
“Kjo është filozofia jonë e qeverisjes, me njerëzit, në terren, jo nga
zyra. Sepse çdo investim që bëjmë ka një qëllim të vetëm: ta kthejë
Çairin në një vend ku secili ndjehet i përfshirë, i respektuar dhe me
kushte dinjitoze për jetesë”, u shpreh Mexhiti duke i falënderuar
nikoqirët e takimit për mikëpritjen e ngrohtë.
