Maqedonia e fitoi çmimin e njohur “Theme Development Award” (Çmimi për Zhvillimin e Temës) në Ekspozitën botërore EXPO 2025 në Osaka, një nga çmimet më të rëndësishme që jepet nga Byroja Ndërkombëtare e Ekspozitave (BIE).
Çmimi u shpall dhe u nda gjatë ceremonisë solemne me rastin e BIE Day – më 12 tetor 2025, me ç’rast pavijoni maqedonas u rendit ndër pjesëmarrësit më të suksesshëm në këtë ngjarje globale.
Ky çmim është një sukses i madh për Maqedoninë, pasi vlerëson kreativitetin, qartësinë konceptuale dhe mënyrën autentike me të cilën pavijoni nacional gjallëron temën qendrore të EXPO 2025 – “Dizajnimi i së ardhmes për jetët tona”.
Pavijoni maqedonas, përmes një qasjeje inovative, një thurjeje kulturore narrative dhe një prezantimi vizual bashkëkohor, arriti ta tregojë historinë e vendit si një urë lidhëse mes traditës dhe së ardhmes, me fokus në lidhjen mes njerëzve, arkitekturës dhe humanitetit. Suksesi është rezultat i përpjekjeve të koordinuara të Sekretariatit të Përgjithshëm të Qeverisë, të udhëhequra nga Kristina Rizovska Kutretinski – Komisionere e Përgjithshme e Republikës së Maqedonisë së Veriut për Expo Osaka 2025, në bashkëpunim me një ekip profesionist dhe të përkushtuar përfaqësuesish, dizajnerë dhe institucione.
Rol kyç në zhvillimin e konceptit dhe identitetit vizual të pavijonit pati agjencia e marketingut “Box Digital”, e cila konceptoi dhe realizoi idenë kreative dhe strategjinë e komunikimit që e pozicionuan Maqedoninë si pjesëmarrëse moderne, lidhëse dhe vizionare në EXPO 2025.
“Ky çmim është një njohje e vizionit dhe punës ekipore me të cilën e prezantuam Maqedoninë në skenën globale. Arritëm ta tregojmë historinë tonë në një mënyrë që është e dallueshme, moderne dhe thellësisht e lidhur me temat e EXPO 2025”, tha Kristina Rizovska Kutretinski.
EXPO 2025 në Osaka po mbahet nën kujdesin e Byrosë Ndërkombëtare të Ekspozitave, me pjesëmarrjen e mbi 160 vendeve dhe organizatave. Çmimet për pjesëmarrësit jepen nga një juri ndërkombëtare, e cila vlerëson pavijonet në katër kategori: arkitekturë, dizajn ekspozitash, qëndrueshmëri dhe zhvillim të temës – kategoria më prestigjioze që nxjerr në pah aftësinë e pavijoneve për ta paraqitur temën qendrore të Ekspozitës në mënyrë inspiruese dhe inovative.
