Komisioni Shtetëror i Zgjedhjeve po bën përgatitjet e fundit për zgjedhjet e 19 tetorit. Në Manastir ka nisur printimi i fletëvotimeve për mbi 1.8 milion votues në 80 komuna.
Materiali zgjedhor deri në fund të javës do t’i shpërndahet Komisioneve Komunale Zgjedhore dhe më pas Këshillave Zgjedhorë. Për printimin e fletëvotimeve janë parashikuar 48 milionë denarë.
“Materiali i besueshëm zgjedhor, sikurse fletëvotimet dhe lista zgjedhore, do të shpërndahen nga shtypshkronja deri tek këshillat komunalë zgjedhorë të enjten. Të premten do të dorëzohen aparatet për identifikim biometrik. Distribuimi gjatë gjithë kohës do të sigurohet nga pjesëtarë të MPB-së. Materiali i besueshëm do të sigurohet nga policia deri në ditën e zgjedhjeve, të dielën.”, njoftojnë nga KShZ-ja.
Paralelisht me aktivitetet në KShZ, drejt fundit edhe aktivitete të tjera zgjedhore. Në mesnatë skadon afati i publikimit të opinionit publik për zgjedhjet lokale. Në mesnatën e 14 tetorit përfundon regjistrimi për të votuar i personave nën arrest shtëpiak.
Votuesit e parë të këtyre zgjedhjeve lokale, të tetat me radhë, votojnë të shtunën. Janë personat e sëmurë dhe të pafuqishëm, personat në arrest shtëpiak, të burgosurit dhe të moshuarit e strehuar në shtëpi të pleqve.
Deri më tani, për të votuar të shtunën janë paraqitur rreth 9 mijë persona të sëmurë, mbi 2 mijë të burgosur dhe 450 të moshuar nëpër shtëpi të pleqve.
Të dielën votimi do të fillojë në ora 07:00 të mëngjesit. Votohet vetëm një herë, individualisht dhe në mënyrë të fshehtë.
