Kandidati për kryetar të Komunës së Çairit, Bujar Osmani, në konferencën e sotme për shtyp njoftoi për një projekt tërësor për sanimin dhe rregullimin e fasadave të të gjitha ndërtesave në pjesën e vjetër të komunës.
“Do të fillojmë një projekt serioz që nga dita e parë për rregullimin e fasadave të të gjitha ndërtesave në Çairin e vjetër. Kjo nuk është vetëm çështje estetike, por edhe çështje e efikasitetit energjetik. Një fasadë e re do të thotë edhe termoizolim i ri, që do t’i ulë shpenzimet për ngrohje në dimër, ndërsa në verë do ta mbrojë hapësirën e jetesës,” theksoi Osmani.
Ai paraqiti gjithashtu detajet se si do të financohen këto projekte, duke theksuar se me planifikim të mirë ato mund të financohen kryesisht me mjete evropiane. Osmani theksoi se, si ish-koordinator kombëtar për fondet evropiane, i njeh mirë punët në këtë fushë dhe tashmë ka formuar një ekip profesional që do të punojë në përgatitjen e projekteve.
“Bazuar në të gjitha analizat që kemi bërë, këto janë projekte që Bashkimi Evropian i mbështet financiarisht, para së gjithash për shkak të efikasitetit energjetik dhe mbrojtjes së mjedisit jetësor. Deri në 85% të shpenzimeve për projekte të tilla mund të sigurohen përmes fondeve evropiane, ndërsa pjesën tjetër prej 15% do ta mbulojë komuna,” tha Osmani dhe shtoi se nga miliardat e eurove që i kanë qenë në dispozicion Maqedonisë së Veriut, Komuna e Çairit gjatë 20 viteve të fundit ka shfrytëzuar zero euro, sepse nuk ka përgatitur projekte dhe nuk ka pasur njerëz profesionistë që dinë të punojnë me projekte të tilla.
Osmani sqaroi se për ndërhyrje të tilla deri më tani, projektet kanë parashikuar që qytetarët të mbulojnë dy të tretat e shpenzimeve, ndërsa komuna vetëm një pjesë të vogël.
“Por njerëzit nuk kanë mundësi t’i përballojnë këto shpenzime për fasadat e përbashkëta, për ashensorët dhe për rregullimin e brendshëm. Prandaj, vlera ime e shtuar si kryetar i ardhshëm i Çairit është që i njoh mirë fondet evropiane, e njoh mirë Brukselin dhe i njoh njerëzit që vendosin për to. Dhe projektet si fasadat, ashensorët e rinj, rregullimi i kësaj pjese të Çairit do të jenë prioritet absolut, dhe me gjithë kapacitetin tim do të fillojnë që nga dita e parë,” theksoi Osmani.
Rikonstruksioni i fasadave dhe ruajtja e pjesës së vjetër të Çairit do të jenë prioritet, theksoi Osmani, duke përsëritur edhe një herë se kjo pjesë do të jetë plotësisht e mbrojtur dhe nuk do të lejohen më ndërtime pa leje.
