Kandidati për kryetar të Komunës së Çairit, Bujar Osmani, në përgjigje ndaj një pyetjeje të gazetarëve, dërgoi një mesazh të fortë për nevojën e disiplinës, punës sistematike dhe përkushtimit personal si parakusht për ndryshime të vërteta në komunë. Ai paralajmëroi se Çairi po përballet me rrezikun e kolapsit të plotë të funksioneve themelore të jetës, nëse vazhdon mosfunksionimi dhe mungesa e vizionit.
“Çairi, nëse vazhdon kështu pa vizion, pas disa vitesh do të mbetet pa rrugë, pa trotuare, pa ujë; qytetarët do të detyrohen të hapin puse në oborret e tyre, sepse ndërtesat pa leje do t’ua vjedhin ujin. Do të mbetet pa kanalizim, pa ajër, pa kushte themelore për jetë,” paralajmëroi Osmani.
Ai theksoi se komunës i duhet një qasje sistematike, e jo parazgjedhore, duke i hedhur poshtë të gjitha akuzat se aktivitetet e tij janë pjesë e fushatës.
“Këto inspektime nuk janë truk parazgjedhor, por mënyrë pune. Dua të tregoj se disiplina dhe përkushtimi janë të domosdoshme nëse me të vërtetë duam të arrijmë diçka,” deklaroi Osmani.
Si pjesë e shembullit të tij personal, Osmani njoftoi se do të vazhdojë çdo mëngjes, nga ora 5:30 deri në 7:30, të patrullojë nëpër Çair me qëllim identifikimin e problemeve dhe defekteve në infrastrukturën urbane, për t’ua përcjellë menjëherë shërbimeve me udhëzime konkrete.
“Çairi ka nevojë për një qasje sistematike, e jo për asfalt parazgjedhor një muaj para zgjedhjeve, duke menduar se në këtë mënyrë mund të manipulohet me njerëzit,” tha Osmani.
Osmani theksoi se disiplina, integriteti dhe vizioni janë kontributi i tij personal për Çairin, e jo interesa partiake apo personale.
“Çairi kërkon përkushtim të përditshëm që nga dita e parë e mandatit. Hyj me integritet, me përvojë, me disiplinë dhe me vizion për atë se ku duhet të arrijmë. Ky është premtimi im më i rëndësishëm ndaj qytetarëve,” përfundoi Osmani.
