Në fillim të mandatit, Tetovën e gjeta me 24 milionë euro borxh dhe me 1001 probleme të pazgjidhura. Nuk kishin bërë asgjë. Tetova ishte rrënuar në çdo aspekt.
Në vend që të ankohemi e të arsyetohemi, zgjodhëm t’i përveshim mangët e t’i zgjidhim problemet një nga një. Sot, po ju prezantoj një zgjidhje tjetër, një projekt tjetër madhor që do ta përmirësojë dukshëm infrastrukturën, sigurinë dhe mirëqenien e qytetarëve.
Po flasim për projektin e madh të kanalizimit atmosferik nga Lagjja Jashtë Vardarit dhe kompleksi Teteks, drejt Bllokut Urban nr.59 dhe deri te kolektori i ri i ujërave atmosferikë në fshatin Falisht. Gjithsej 2,5 kilometra kanalizim atmosferik në këto 3 segmente, investim prej rreth 52 milionë denarësh. Gjithashtu, po bëhet edhe kolektori për kanalizimin atmosferik në bulevardin VS Bato në gjatësi prej 1.150, investim mbi 25 milionë denarë.
Edhe në lagjen Dardania po e zgjidhim këtë problem. Aty ndërtohet kolektori për kanalizimin atmosferik në gjatësi prej 950 metrash, që do të kushtojë 19.5 milionë denarë. Pra, gati 5 kilometra infrastrukturë kanalizimi gjithsej, mbi 96 milionë denarë investim në rrjetin e kanalizimit për Tetovën.Kështu largojmë rrezikun nga përmbytjet, mbrojmë qytetarët dhe infrastrukturën rrugore njëkohësisht.
Të dashur qytetarë,
Tetova do të vazhdojë të zhvillohet në çdo segment. Koha e stagnimit ka kaluar. Tetova po transformohet dhe ky zhvillim do të vazhdojë me Kapitullin e Dytë, edhe më shumë, edhe më mirë, edhe më fuqishëm.
