Kandidati për kryetar të komunës së Çairit nga koalicioni VLEN, Izet
Mexhiti vizitoi Shoqatën e Pensionistëve në Çair ku takoi përfaqësues të
tyre që kanë dhënë kontribut të pazëvendësueshëm në ndërtimin e
shoqërisë në vend.
“Kjo vizitë ka një domethënie të veçantë për mua. Nuk jam këtu vetëm për
të dëgjuar, por për të treguar se premtimet po bëhen realitet”, u shpreh
Mexhiti, duke theksuar rëndësinë e mbështetjes konkrete për të
moshuarit.
Gjatë kësaj vizite, ai bëri të ditur se Shoqata e Pensionistëve tashmë
ka në përdorim një hapësirë shtesë për aktivitete ditore, si pjesë e
angazhimit për ta bërë këtë kategori më të përfshirë në jetën shoqërore.
Mexhiti kujtoi gjithashtu se gjatë këtij viti, mbështetja nga qeveria
për pensionistët ka qenë e prekshme, me rritjen e pensioneve si një masë
direkte që përmirëson sigurinë ekonomike të të moshuarve.
Nga 1 Tetori është realizuar një tjetër rritje, dhe me rritjen që pritet
në muajin mars, pensionistët do të përfitojnë gjithsej 7,000 denarë
shtesë, një hap i rëndësishëm drejt përmirësimit të standardit të tyre.
“Kujdesi për pensionistët është pjesë kyçe e programit tim politik. Do
të vazhdojmë të investojmë në ambientet, shërbimet dhe mirëqenien e
tyre. Sepse një komunë e mirë matet edhe nga mënyra si i trajton më të
moshuarit e vet”, theksoi Mexhiti.
