Italia dhe Greqia i kanë bërë thirrje të përbashkët Izraelit që të garantojë sigurinë e aktivistëve ndërkombëtarë në bordin e Flotiljes Global Sumud, e cila po udhëton drejt Gazës me ndihma humanitare.
Në një deklaratë të përbashkët zyrtare, Roma dhe Athina kërkuan që autoritetet izraelite të sigurojnë “sigurinë e pjesëmarrësve dhe të lejojnë të gjitha masat e nevojshme të mbrojtjes konsullore”.
Kjo flotilje përfshin aktivistë nga shumë vende, mes tyre edhe aktivistja e njohur për klimën Greta Thunberg. Në një video të shpërndarë nga bordin e njërës prej anijeve, shihet një anije luftarake izraelite që supozohet se po i afrohej flotiljes.
Ndërkohë, Italia dhe Greqia i kanë bërë thirrje edhe vetë aktivistëve që të pranojnë një propozim kompromisi: t’ia dorëzojnë ndihmat Kishës Katolike, e cila do të mund t’i shpërndajë ato në Gaza pa konfrontime të drejtpërdrejta me Izraelin.
Por aktivistët e kanë refuzuar këtë propozim, duke theksuar se misioni i tyre nuk ka të bëjë vetëm me dërgimin e ndihmave, por me sfidimin e bllokadës detare të Gazës, të cilën ata e quajnë të paligjshme.
