Universiteti “Nënë Tereza” në Shkup shënoi sot fillimin e vitit të ri akademik 2025/2026 me një ceremoni solemne para kampusit universitar, duke mirëpritur gjeneratën e dhjetë të studentëve. Ky vit shënon një arritje të veçantë për institucionin, pasi për herë të parë numri i studentëve të regjistruar ka arritur në 1040, duke e pozicionuar UNT-në si një ndër universitetet me ritmin më të lartë të rritjes në vend.
Në fjalën hyrëse, rektori i UNT-së, Prof. Dr. Bekim Fetaji, vuri theksin mbi rëndësinë e këtij momenti për jetën akademike të studentëve të rinj dhe paraqiti katër objektivat strategjike të universitetit për vitin e ri: rritjen e cilësisë akademike, forcimin e lidhjes me tregun e punës, avancimin e infrastrukturës universitare dhe thellimin e bashkëpunimit ndërkombëtar.
Kryetarja e Senatit, Prof. Dr. Olivera Petrovska, theksoi misionin e UNT-së si një institucion ku studentët, përveç dijes profesionale, zhvillojnë edhe personalitetin, përballen me sfida dhe ndërtojnë miqësi e bashkëpunime të reja, duke gjetur mbështetje të vazhdueshme akademike dhe institucionale.
Ndërsa prorektori për Arsim, Prof. Inor. Dr. Fati Iseni, vuri në pah rëndësinë historike të këtij viti akademik me tejkalimin e shifrës së 1040 studentëve të rinj. Ai theksoi se UNT është vend i dijes dhe i mendimit kritik, ku tejkalohen paragjykimet dhe ku promovohet një kulturë e solidaritetit dhe bashkëpunimit, duke u bërë shembull i universiteteve moderne dhe gjithëpërfshirëse.
Pas përmbylljes së programit solemn, studentët e rinj patën mundësinë të njihen nga afër me strukturat akademike dhe programet studimore të fakulteteve përkatëse.
UNT riafirmon përkushtimin për të ofruar arsim cilësor, për të përgatitur profesionistë të së ardhmes dhe për të kontribuar në zhvillimet shoqërore e akademike në vend dhe më gjerë.
#UNT #MirëSeViniStudentë #FamiljaAkademike #FillimiIRrugëtimit #DijaËshtëFuqia #EArdhmjaJuTakon #GjenerataERe #Studentë1040 #RekordNëUNT #UniversitetiNënëTereza #VitiAkademik2025_2026 #ArsimiLartë #Akademia #Shkupi #StudentëTëRinj #CilësiAkademike #Edukim #Kurrikula
