Zëvendëskryeministri i parë dhe kandidat për kryetar të Çarit, Izet Mexhiti tha se jo rastësisht për një vit e pak muaj opozita në krye me BDI-në ndryshuan emërtimin dhe përbërjen disa herë, vetëm për të fshehur një të vërtetë të hidhur: se pas gjithë kësaj “aleance” fshihet frika nga emri BDI.
“Dikur simbol krenarie, sot ky emër është shndërruar në simbol të korrupsionit endemik: SORAVIA, LLOTARIA, AS SENJAK, këto janë arsyet e vërteta prapa koalicionit AKI! Dhe prandaj ne do t’i fitojmë në zgjedhje dhe do t’i demaskojmë aferat e tyre!”, tha Mexhiti në Konventën e sontme të VLEN në Shkup.
Ai tha se brenda strukturës AKI, protagonistët nuk flasin as mes vete, por qëndrojnë aty të kapur, me hesapet e tyre të papastra dhe me hipoteka të pashlyera ndaj “liderit suprem”. Prandaj ne do t’i mundim fort në zgjedhje!, shtoi ai.
“’Lideri suprem’ i AKI -së jeton në iluzion, i duket vetja i përjetshëm në fron. Ai flet e sillet si sundimtar, duke lavdëruar bashkëpunëtorët në publik dhe duke u ngritur kurthe pas shpine. Një model i dështuar që nuk ka as vizion, as drejtësi, as moral politik – vetëm interesa të ngushta personale, të cilat i kanë mbajtur peng shpresat e qytetarëve për kaq shumë vite. Prandaj, në këto zgjedhje ne do t’i fitojmë- jo do t’i fitojmë, do t’i deklasojmë!”, tha Mexhiti.
Këto zgjedhje, sipas tij, nuk janë zgjedhje të zakonshme.
“Votojmë për t’i dërguar në pension politik shokët e Artan Grubit! Votojmë për t’i demaskuar njëherë e mirë ideologët e VALIXHEVE, KAZINO-politikën dhe SORAVIA- patriotët!”, tha ai.
Në fund Mexhiti ka dy fjalë për “doktorin e Tik-Tokut”, Bujar Osmanin.
“Nuk e fiton respektin dhe përkrahjen e Çairit duke qëndruar më afër Zajazit dhe më së paku në Çair, duke kërcyer nga Çarshia në Beograd, nga lidhjet “live” në Fejsbuk tek darkat e fshehta në Budapest. Sepse Çairi nuk është trampolinë për politikanë kamikazë! Çairi nuk e don arrogancën, dhe e dënon prepotencën! Çairi nuk është pistë për eksperimente politike! Çairi është burrni, Çairi është nder, Çairi është krenari!”, thekson mes tjerash Mexhiti.
