Kandidati për kryetar të komunës së Çairit, Izet Mexhiti në Konventën e sontme të VLEN në Shkup, nën praninë e shumë simpatizantëve tha se jemi mbledhur jo thjesht për Konventë partiake, “por për një betejë morale, kushtrim politik dhe mision kombëtar”.
Mexhiti tha se ekziston një rregull bazë në politikë: mos përdor frikësimin, gjuhën e urrejtjes, mos përçaj, sepse politika nuk është luftë për pushtet personal, por shërbim ndaj qytetarëve dhe përgjegjësi e brezave.
“Prandaj ndaj atyre që kanë mbushur fushatën me frikë, përçarje dhe arrogancë kam një mesazh: mos përdorë frikësimin, sepse shqiptari nuk tutet, mos përdor gjuhën e urrejtjes, sepse shqiptari nuk urren, mos përçaj sepse shqiptarin nuk e përçan dot sado që përpiqesh”, tha Mexhiti, si përgjigje ndaj toneve të opozitës.
Gatë këtyre ditëve, ai tha se ka marrë mesazhe nga çdo cep i vendit, edhe nga diaspora dhe këto mesazhe sipas Mexhitit, bartin një ndjenë të përbashkët: zhgënjimin nga ata që një vit më parë kërcënonin se me uragan do të na rrafshonin me tokë, që shëtisnin me valixhe nëpër Çair dhe e quajtën Çairin, Kandahar.
“Sot me të njëjtën arrogancë guxojnë t’i quajnë shqiptarët zagarë. Por unë dua të them se nuk ua kthejmë prej burrnisë, jo prej tutës, sepse shkupjani nuk tutet, kur e lyp nevoja e le qeverinë e del në mejdan. Prandaj po ju them, jo nuk jemi zagarë, por jemi shqiptarë, nuk jemi as hyzmeqarë as gënjeshtar, jemi njerëz me dinjitet, nuk jemi tradhtarë, nuk e mbështesim Ballkanin e hapur, nuk e njohim Daka Davidoviqin, nuk i kem i shitur aksione bankës serbe, nuk kemi sjell kazinotë serbo- ruse në mesin e shqiptarëve”, tha Mexhiti.
Ai midis tjerash në paraqitjen e tij shtoi: Nuk jemi vasal, nuk vrapojmë në dhomën 161 për të lutur të jemi në qeveri pa asnjë kusht dhe pa asnjë kërkesë, nuk shkojmë në Budapest për të negociuar me Nikolla Gruevskin dhe nuk i kemi asnjë borxh Sasho Mijallkovit.
