Në një atmosferë impozante dhe me prezencë masovike, VLEN zhvilloi sot konventën promovuese në sallën “Boris Trajkovski” në Shkup, ku u prezantuan kandidatët për kryetarë komunash, mes tyre edhe kandidati për kryetar të qytetit të Shkupit, Bashkim Bakiu.
Në fjalën e tij, Bakiu u shpreh me krenari dhe përulësi para qytetarëve të Shkupit, duke theksuar se vizioni i tij është kthimi i kryeqytetit në një qytet modern, të gjelbër dhe të hapur për të gjithë. “Shkupi meriton të jetë vendi ku çdo familje ndjehet e sigurt, ku të rinjtë kanë mundësi për arsim, punësim e zhvillim, dhe ku secili banor ka kushte më të mira jetese”, tha ai.
Ai potencoi se kujdesi i ardhshëm i qytetit do të jetë për çdo lagje dhe vendbanim nga Stracinca e Hasanbegu, deri në Luboten e Butel, Shuto Orizarë e Vizbeg, por edhe për vendbanimet e harruara si Nerez i Nikishtan. “Nuk do të ketë më diskriminim ndaj Çairit dhe as keqmenaxhim si deri më tani nga Levica, Danella dhe BDI”, theksoi Bakiu.
Një mesazh i veçantë iu kushtua edhe komunave jashtë kufijve administrativë, por që përbëjnë zemrën e shqiptarëve në Shkup, si Haraçina dhe Studeniçani. “Ky angazhim nuk është vetëm program politik, është një zotim për Shkupin, për familjet tona dhe për të ardhmen e fëmijëve tanë. Bashkimi është çelësi i suksesit. Kur jemi të bashkuar, ndryshojmë fatin e komunave shqiptare”, tha ai, duke përmendur edhe shembullin e Arben Fetait, i cili ndaloi ndarjen e 107 mijë votave dhe mbeti besnik brenda VLEN-it.
