Sabri Aziri, zëdhënës i Shtabit Lokal të koalicionit VLEN në Çair, ka kritikuar sot kandidatin opozitës për komunën e
Çairit, Bujar Osmani, për mungesë të interesit real ndaj qytetarëve dhe për fokus të tepruar në çështje që janë kompetencë e pushtetit qendror.
“Kandidati i opozitës për komunën e Çairit, Bujar Osmani, nuk interesohet për banorët e Çairit, ai i sheh ata vetëm si mjet për
realizimin e qëllimeve personale. Ai as që i njeh kompetencat e sakta të komunës, as që mund t’i dallojë nevojat e vërteta të qytetarëve. Prandaj më së shumti preferon të flasë për tema që janë kompetencë e pushtetit
qendror.” tha Aziri.
Ai përmendi si shembull mënyrën se si Osmani flet për bashkimin shqiptar në vitet ’90 dhe për aktivitetet politike në vitet ’90-ta dhe 2001 sikur të kishte qenë pjesëmarrës i drejtpërdrejtë, megjithëse në vitin 1991 ai
ishte vetëm 11 vjeç dhe në vitin 2001 vetëm 21 vjeç.
“Për fat të keq, ambiciet e tij qartë e shtyjnë që sasia e trillimeve që i plason çdo ditë të marrë përmasa të gënjeshtrave epike. Një shembull është kur foli për bashkimin shqiptar në vitet ’90 të shekullit të kaluar dhe jepte vlerësime sikur të kishte qenë pjesëmarrës i
drejtpërdrejtë. Bujari në vitin 1991 ka pasur 11 vjet, ndërsa në vitin 2001 ka pasur 21 vjet, por pa asnjë turp flet sikur ka qenë aktiv në
proceset e etablimit të forcës politike
shqiptare dhe në UÇK. Fiksimi i Bujarit për t’i dhënë vetes ndonjë rol historik po i shqetëson edhe bashkëpunëtorët e tij më të afërt, të cilët gjithnjë e më shumë dyshojnë në korrektësinë e vlerësimeve të tij. Një nënçmim i tillë i inteligjencës së shqiptarëve nuk është parë në historinë e re politike”
shtoi zëdhënësi i Shtabit Lokal të VLEN-it në Çair.
Aziri paralajmëroi se nuk do të ishte befasi nëse Osmani pretendon se ka qenë pjesë e kabinetit presidencial të Ibrahim Rugovës në Kosovë.
“Nuk do të na befasojë nëse herën tjetër thotë se ka qenë edhe në kabinetin presidencial të Ibrahim Rugovës në Kosovë. Prandaj, interesxhinjtë e këtillë si Bujari, do të fshihen në zgjedhjet lokale.
Së fundi, le të përgjigjet Bujar Osmani sa ditë gjithsej ka kaluar me qytetarët në Çair gjatë mandateve të tij në qeveritë e Gruevskit dhe të
LSDM-së që tani të ketë fytyrë t’ua kërkojë besimin?” përfundoi Aziri.
