Sot, në Qeverinë e Republikës së Maqedonisë së Veriut u mbajt eventi me rast të promovimit të Programit Pesëvjeçar 2026–2030 të Fondit të Kombeve të Bashkuara për Popullsinë (UNFPA) për vendin, me titull – “Trendet Demografike” – aksion i përbashkët për investim dhe shfrytëzim të kapitalit njerëzor përmes Programit Pesëvjeçar të Qeverisë dhe UNFPA-së.
Eventin e hapi Kryeministri, Hristian Mickoski, i cili theksoi se programi nuk është vetëm dokument apo formalitet, por është plan veprimi – vizion dhe strategji, që do të realizohet me aktivitete konkrete, të orientuara drejt së ardhmes së vendit tonë dhe të qytetarëve tanë.
“Kur flasim për resurset, shpesh përmendim pasuritë minerale, financat, infrastrukturën, energjinë, ujin ose burimet natyrore. Të gjitha këto janë të rëndësishme. Por, resursi më i rëndësishëm, i cili i vë në lëvizje të gjithë të tjerat – është kapitali njerëzor. Nuk ka asgjë pa njerëzit. Nuk ka asgjë pa popullin dhe pa demografinë. Qeveria është e vetëdijshme për seriozitetin e kësaj çështjeje dhe tashmë po punon në disa linja. Krijuam rritje më të lartë ekonomike në Ballkan – që nënkupton vende të reja pune, paga më të larta, si dhe mundësi më të mëdha për të rinjtë” – theksoi Mickoski.
Ministri i Politikës Sociale, Demografisë dhe të Rinjve, Fatmir Limani, theksoi se me Programin e ri Pesëvjeçar 2026–2030, të miratuar nga Qeveria dhe nga Bordi Ekzekutiv i UNFPA-së, Maqedonia e Veriut po hyn në një kapitull të ri.
“Qëllimi ynë është i thjeshtë, por i madh: të investojmë te njerëzit, në potencialin e tyre, në të ardhmen e tyre. T’i mbështesim të rinjtë në mënyrë që të kenë mundësinë të mësojnë, të punojnë dhe të kenë sukses pikërisht këtu, në shtëpi (në vendin tonë). T’i inkurajojmë për rikthim ata që u larguar, që të sjellin dituri, ide dhe energji të re në vend. T’i përforcojmë familjet sepse ato janë rrënja e çdo shoqërie të shëndetshme dhe stabile. Të krijojmë kushte në të cilat çdo fëmijë, pa përjashtim, do të ketë mundësi të barabarta për rritje dhe zhvillim. Të ndërtojmë komunitete lokale, të cilat ofrojnë jetë cilësore, në mënyrë që çdo qytetar të mund ta shohë të ardhmen e tij aty ku jeton. Por, ky vizion nuk mund të realizohet nëse veprojmë individualisht. Për të pasur sukses, duhet ta ndërtojmë të ardhmen bashkërisht. Kur institucionet shtetërore, vetëqeverisja lokale, organizatat e shoqërisë civile dhe komuniteti biznesor punojnë si tërësi, ne mund ta bëjmë programin realitet” – shtoi më tej, Limani.
Drejtoresha e UNFPA-së për rajonin e Evropës Lindore dhe të Azisë Qendrore, Florens Bauer, vuri në dukje se Programi i ri për vendin është kremtim i vizionit të përbashkët të një shoqërie demografikisht rezistente dhe gjithëpërfshirëse.
“Dokumenti është në harmonizim me prioritetet kombëtare të Qeverisë me fokus strategjik mbi dhënien fund të pabarazive, mbi detyrimin që të investojmë në kapitalin njerëzor të Maqedonisë së Veriut dhe të sigurojmë të ardhme prosperuese për të gjithë qytetarët” – potencoi Bauer.
Programin Pesëvjeçar të Fondit të Kombeve të Bashkuara për Popullsinë (UNFPA) për periudhën 2026-2030 e prezantoi Afrodita Shala, Shefe e zyrës së UNFPA-së në Maqedoninë e Veriut.
Programi është miratuar nga Qeveria e Republikës së Maqedonisë së Veriut, në harmonizim me prioritetet dhe me përpjekjet kombëtare me fokus në Strategjinë Kombëtare Demografike 2024-2044, si dhe me Kornizën e Bashkëpunimit për Zhvillim të Qëndrueshëm ndërmjet Republikës së Maqedonisë së Veriut dhe Kombeve të Bashkuara, dokument strategjik, i cili e orienton punën e të gjitha agjencive të OKB-së që veprojnë në vend gjatë pesë viteve të ardhshme.
