Fushata për zgjedhjet lokale fillon në mesnatë dhe do të zgjasë deri më 17 tetor, ndërsa raundi i parë i zgjedhjeve do të mbahet dy ditë më vonë, më 19 tetor. Para fushatës, kryetari i Kuvendit, Afrim Gashi, u bëri thirrje të gjithë pjesëmarrësve në zgjedhje të tregojnë frymë demokratike dhe të shmangin gjuhën e urrejtjes si dhe keqpërdorimin e resurseve shtetërore.
” Gara politike duhet të zhvillohet në frymën e një demokracie të shëndetshme. Duhet të jetë garë e ideve dhe programeve, pa incidente, pa frikësime, pa fyerje apo nënçmime. Qytetarët meritojnë respekt kurse demokracia kërkon përgjegjësi”, tha Afrim Gashi, Kryetar i Kuvendit.
Në zgjedhjet e teta lokale që nga pavarësia e vendit, do të garojnë 309 kandidatë për kryetar në të gjitha komunat dhe 577 lista të kandidatëve për anëtarë të këshillave me gjithsej 10,499 kandidatë. Qyteti i Shkupit ka më shumë kandidatë për kryetar respektivisht 18, Struga 9 kandidatë, vijon Kumanova me shtatë kandidatë, pastaj gjashtë në Tetovë kurse katër kandidatë do të garojnë për pushtetin lokal në Strumicë. Kur bëhet fjalë për komunat e Shkupit, më shumë kandidatë për kryetar komune ka në Shuto Orizare – tetë, Kisella Voda dhe Gazi Baba me shtatë, gjashtë Aerodromi, pesë i ka Karposhi kurse katër kandidatë do të garojnë për postin e kryetarit të komunës në Qendër. Nga tre kandidatë janë regjistruar në Çair dhe Ilinden. Në këto zgjedhje do të marrin pjesë gjithsej 22 parti dhe 19 koalicione, ndërsa numri i kandidatëve të pavarur, të cilët me ligj janë të përcaktuar si grup votuesish, është 119.
1,832,415 votues kanë të drejtë vote në zgjedhjet lokale. Raundi i dytë i zgjedhjeve lokale do të mbahet më 2 nëntor./Alsat.mk
