Një prokuror nga Prokuroria Themelore Publike Shkup ka sjellë urdhër për zhvillimin e procedurës hetimore kundër një personi, për të cilin dyshohet se gjatë dy muajve të fundit ka kryer veprën penale – Shtrëngim, sipas nenit 258 paragrafi 1 të Kodit Penal.
I dyshuari, përmes telefonatave dhe mesazheve në aplikacione të ndryshme, ka kontaktuar vazhdimisht një grua që jeton jashtë vendit, duke i dërguar kërcënime serioze për jetën e saj, si dhe të nënës dhe vëllait të saj, nëse nuk i paguante 15.000 euro.
Asaj i kishte dhënë afat deri më 26.09 për pagesën, dhe ishin marrë vesh që më 17 shtator t’i dërgonte 500 euro përmes Western Union. Për një shumë shtesë prej 4.500 euro, gruaja duhej të vinte në vend dhe t’ia dorëzonte para Klinikës së Onkologjisë.
Pasi ajo erdhi në vend më 25 shtator, menjëherë e denoncoi rastin. Kur 37-vjeçari u paraqit në vendin e caktuar për të marrë paratë, ai u arrestua.
Duke marrë parasysh rrezikun e arratisjes, mundësinë e ndikimit mbi dëshmitarët dhe viktimën ose përsëritjen e veprës, prokurori publik ka propozuar që ndaj të dyshuarit të caktohet masa e paraburgimit.
