Atletico Madrid i ka dhënë një leksion të paharrueshëm Real Madridit, duke e mposhtur me rezultat të thellë 5:2 në derbin madrilen, në kuadër të javës së 7-të të La Ligas.
Ndonëse “Los Blancos” vinin si liderë të pamposhtur, Atletico vendosi t’u kujtojë se sezoni ka 38 ndeshje – dhe jo vetëm 6. Golat e vendasve u shënuan nga Robin Le Normand (14’), Alexander Sorloth (45+3’), Julian Alvarez (50’, 64’) dhe Antoine Griezmann (90+4’), me një kombinim spektakli, presioni dhe efikasiteti të pastër, transmeton lajmi.net
Real Madrid tentoi të reagojë përmes Kylian Mbappes (25’) dhe Arda Guler (36’), por përballë mbrojtjes së shpërqendruar dhe mungesës së përgjigjes në pjesën e dytë, gjithçka u kthye në një shëtitje triumfale për skuadrën e Diego Simeones.
Kjo është humbja e parë e sezonit për Realin, që mbetet në vendin e parë me 18 pikë, vetëm 2 më shumë se Barcelona, e cila luan nesër dhe mund ta parakalojë pa shumë vështirësi.
Nga ana tjetër, Atletico Madrid ngjitet në vendin e katërt me 12 pikë, duke rikthyer vetëbesimin dhe duke “kallëzuar” se derbi i Madridit nuk është vetëm për dekor./lajmi.net/
