Zv/Ministri i bujqësisë, Albrim Hoxha dhe kandidati i VLEN për Tearcën, Daut Memishi kanë realizuar sot takim me bujqit e Sllatinës, ku kanë dëgjuar hallet e tyre. Bujqive u është premtuar se shumë shpejt do të hapet Njesi Rajonale në Tearcë.
“Me zëvendësministrin e Bujqësisë, Pylltarisë dhe Ekonomisë së Ujërave, z. Albrim Hoxha, zhvilluam një takim me bujqit e fshatit Sllatinë, ku bashkëbiseduam për sfidat dhe vështirësitë me të cilat ata përballen çdo ditë.
Rajoni i Pollogut dikur ka qenë një nga zonat me potencialin më të madh bujqësor në vend, por për fat të keq, vitet e fundit është lënë pas dore. Askush nuk është kujdesur për bujqit tanë, për tokën dhe për zhvillimin rural siç duhet.
Para qytetarëve të Tearcës premtoj se me mbështetjen e pushtetit qendror, do të punojmë për çdo bujk dhe shumë shpejt do të inicioj hapjen e një Njësie Rajonale për Bujqësi në Komunën e Tearcës. Kjo njësi do të jetë një derë e hapur për të gjithë bujqit, ku do të marrin ndihmën dhe mbështetjen që meritojnë”, ka shkruar Memishi.
