Buteli po hyn në një epokë të re zhvillimi me nënshkrimin e marrëveshjes për ndërtimin e një poliklinike ultramoderne në këtë komunë. Kryetari i Butelit, Darko Kostovski, njëherësh kandidat i VMRO-DPMNE-së për mandatin e dytë, nënshkroi sot marrëveshjen në Ministrinë e Shëndetësisë, në prani të ministrit Azir Aliu.
“Ju premtova dhe do ta realizoj! Poliklinika e re do të jetë një projekt historik për qytetarët e Butelit”, deklaroi Kostovski, duke e cilësuar këtë si një nga investimet më të mëdha të komunës.
Ky projekt madhor, bartës i të cilit është Komuna e Butelit, realizohet në partneritet me Ministrinë e Shëndetësisë, ndërsa mbështetje të fuqishme ka dhënë edhe kryeministri Hristijan Mickoski.
Sipas Kostovskit, procesi ka nisur me projektimin dhe dizajnimin e kujdesshëm të objektit, që do të përmbushë standardet më të larta të sigurisë dhe cilësisë. Poliklinika e re do t’u ofrojë qytetarëve të Butelit shërbime shëndetësore moderne dhe të shumta, duke i kursyer atyre udhëtimet e gjata drejt qendrave tjera.
Objekti do të ndërtohet në vendin e ish ambulancës, ku tashmë është miratuar edhe plani urbanistik i detajuar.
“Shumë shpejt fillojmë me ndërtimin dhe mezi pres momentin të vendosim gurthemelin e kësaj poliklinike, që do të shënojë hapin më të madh historik për Butelin dhe qytetarët e tij”, përfundoi Kostovski.
Sipas Kostovskit, projekti i ri i shëndetësisë në Butel pritet të kthehet në një nga simbolet e zhvillimit dhe përparimit të komunës.
