Sot, zëvendëskryeministri i parë dhe njëherit kandidat i koalicionit VLEN për kryetar të komunsë së Çairit, Izet Mexhiti inspektoi punimet për rikonstruktimin e rrugës “Maksut Sadik” në Çair, projekt i rëndësishëm infrastrukturor që lidh këtë pjesë të komunës me bulevardin “Nikolla Karev” dhe me Universitetin “Nëna Terezë”, ku së shpejti do të ndërtohet një kampus modern universitar.
Bëhet fjalë për një investim prej rreth 220.000 euro, i cili realizohet me mbështetje të Qeverisë në kuadër të Programit për projekte
infrastrukturore në komuna për vitin 2025.
“Sot jam këtu së bashku me ju për të ndjekur përparimin e rikonstruimit të rrugës ‘Maksut Sadik’. Kjo rrugë nuk është vetëm një arterie e
zakonshme komunikacioni, por një lidhje jetike që e bashkon këtë pjesë të Çairit me bulevardin ‘Nikolla Karev’, me Universitetin ‘Nëna Terezë’, ku shumë shpejt do të ndërtohet një kampus modern universitar. Ky është një investim prej rreth 220.000 euro, që realizohet me mbështetje të Qeverisë në kuadër të Programit për projekte infrastrukturore në komuna për vitin 2025”, u shpreh Mexhiti.
Punimet, siç u theksua nga ai, po ecin me ritme të shpejta dhe projekti pritet të përfundojë për dy javë.
“Kjo do të thotë se banorët e këtij rajoni, veçanërisht komuniteti rom, i cili prej vitesh ka pritur kushte më të mira për lëvizje, më në fund do të kenë infrastrukturën që e meritojnë”.
Mexhiti shtoi se ky projekt nuk ka të bëjë vetëm me asfalt, por me përkushtim konkret ndaj komunitetit.
“Për mua, kjo është më shumë se asfalt dhe një rrugë e re. Kjo është një dëshmi se kur Qeveria dhe komuna bashkëpunojnë, rezultatet arrijnë deri tek njerëzit.Ky është shembull se si veprat konkrete e ndryshojnë realitetin e
përditshëm”, tha ai.
Duke e njohur Çairin në çdo cep, Mexhiti ritheksoi angazhimin e tij personal për zhvillimin e komunës.
“Si njeri që gjithë jetën e ka kaluar në Çair, e njoh mirë çdo rrugë dhe çdo problem. Përkushtimi im është i qartë: të sigurojmë investime të reja, kushte të reja dhe energji të re për Çairin. Ky është vetëm fillimi. Çairi ka potencial, ka forcë dhe do të ketë zhvillimin që e meriton”, vlerësoi Mexhiti.
