Zëvendëskryeministri, Arben Fetai, ka bërë një reagim të fuqishëm në rrjetin social Facebook, ku ka komentuar dukurinë e njohur si “zelli i të konvertuarit”, një fenomen që lidhet me sjelljen e atyre që braktisin bindjet e tyre fillestare dhe i bashkohen një kampi të ri ideologjik apo politik, duke aluduar te ish bashkpartiakët e tij në ASH.
Në postimin e tij, Fetai shkruan se “nuk ka asgjë më të shpifur se zelli i të konvertuarit”, duke e përshkruar këtë sjellje si një përkushtim fanatik, por të rremë, që shpesh tejkalon edhe atë të vetë ideologëve të kampit të ri.
“Kur tradhtari braktis shtëpinë e tij dhe kalon te kundërshtari, rëndom ai shndërrohet në mbështetësin më të flaktë të padronit të ri, duke marrë mbi vete çdo gjynah të tij dhe duke u bërë armiku më i egër i ish-shokëve”, shkruan Fetai.
Ai shton se ky lloj fanatizmi është shpesh një përpjekje për të fshehur konfliktin e brendshëm dhe disonancën kognitive që ndjen individi i konvertuar, ndërsa veprimet ekstreme që ndërmerr janë, sipas tij, “rituale vetë-ndëshkuese” për të shlyer të kaluarën dhe për të heshtur ndërgjegjen.
“Fanatizmi i të konvertuarit nuk është thjesht ligësi, por shprehje e torturës së brendshme që mundon këta shpirtra të trazuar. Të tillë individë meritojnë vetëm mëshirë dhe keqardhje”, përfundon Fetai.
