Një situatë e rrallë ka ndodhur në Komunën e Likovës: i njëjti projekt është paguar dy herë me fonde publike.
Dokumentet zyrtare nga Byroja Për Prokurime Publike ngjallin dyshime për keqpërdorim, pasi tregojnë se terreni sportiv në fshatin Ropalcë të kësaj komune, është paguar fillimisht në vitin 2019, kur Komuna e Likovës nënshkroi kontratë në vlerë prej 4.6 milionë denarësh apo rreth 75 mijë eurosh me një kompani private për ndërtimin e këtij terreni. Projekti u promovua si i përfunduar në tetor 2021 nga kryetari i komunës, i cili e dorëzoi objektin për përdorim në shkollën fillore të fshatit.
Megjithatë, në janar të vitit 2025, në faqen e prokurimeve publike figuron një tender i ri prej afro 60 mijë eurosh për të njëjtin terren sportiv. Ky projekt u financua nga Qeveria, pas aplikimit të Komunës së Likovës.
I pyetur përse për një projekt për të cilin në vitin 2021 ka njoftuar se është përfunduar tani përsëri ka aplikuar për mjete nga Qeveria, Arifi nuk ishte i qartë. Ai përmendi vetëm tenderimin e fundit.
Në vitin 2021 e keni promovuar terrenin sportiv në fshatin Ropalcë. Për të njëjtin projekt, pastaj e kam parë te furnizimet publike që përsëri keni marrë para edhe nga Qeveria, me financim që ka bërë terrenet sportive. Pse dy herë ky projekt?
“Nuk është. Nuk e di konkretisht. Unë çka mund të them është se terreni i hapur sportiv multifunkcional në shkollën fillore komunale “5 Tetori” në fshatin Ropalcë, kemi aplikuar në thirrjen e parë nga kredia hungareze ku e kemi fituar si projekt, dhe pas çka e kemi nënshkruar kontratën. Është realizuar edhe procedura e tenderimit është lidhur kontrata dhe janë realizuar punimet. Dhe jemi në fazën finale të punimeve”, tha për VOXAL Erkan Arifi, kryetar i Likovës.
Mbetet e paqartë për opinion se pse është paguar dy herë ky projekt, i cili ishte promovuar si “i përfunduar” 4 vjet më parë./VOXAL
