Deputetja Mimoza Musa, mori pjesë në Takimin e Rrjetit të Parlamentarëve të Rinj të Asamblesë Parlamentare të OSBE-së, i cili u zhvillua nga 17 deri më 19 shtator 2025 në Nikozia dhe Ayia Napa, Qipro.
Së bashku me kolegët e saj, shefen e delegacionit Monika Zajkova dhe deputetin Boban Karapejovski, Musa përfaqësoi vendin në këtë ngjarje të rëndësishme ndërparlamentare.
Takimi përfshiu dy sesione pune me temat: “10 vjet nga Rezoluta 2250 e OKB-së për rininë, paqen dhe sigurinë” dhe “Strehimi i përballueshëm për të rinjtë në rajonin e OSBE-së”.
Në sesionin e dytë, deputetja Musa mbajti fjalim, ku theksoi sfidat me të cilat përballen të rinjtë në rajonin tonë për sa i përket strehimit, duke vënë në pah ndikimin negativ që kostot e larta të banimit kanë në pavarësinë dhe zhvillimin e tyre social. Ajo prezantoi gjithashtu përvojën e Maqedonisë së Veriut në ndërtimin e banesave sociale në bashkëpunim me partnerë ndërkombëtarë, si dhe rëndësinë e mbështetjes nga fondet evropiane për vendet që aspirojnë anëtarësimin në BE.
Gjatë qëndrimit në Qipro, delegacioni zhvilloi takime të frytshme me kryetaren e Parlamentit të Qipros, Anita Demetriou, si dhe me përfaqësues të vetëqeverisjes lokale në disa qytete.
Deputetja Musa vlerësoi takimin si një platformë të vlefshme për shkëmbimin e përvojave, ideve dhe praktikave të mira mes parlamentarëve të rinj të OSBE-së, duke theksuar rëndësinë e rolit të të rinjve në politikë dhe në ndërtimin e shoqërive më gjithëpërfshirëse dhe të qëndrueshme.
