Zëvendësministri i Bujqësisë, Albrim Hoxha, ka zhvilluar sot një sërë takimesh pune me drejtues të institucioneve kyçe që lidhen me këtë sektor, me qëllim forcimin e bashkëpunimit dhe krijimin e politikave më efikase për fermerët dhe qytetarët.
Në Agjencinë për Ushqim dhe Veterinari, Hoxha u takua me drejtorin Oliver Millanov dhe zëvendësdrejtorin Fadil Asani, ku temë qendrore ishte siguria ushqimore dhe standardet që prekin drejtpërdrejt fermerët dhe konsumatorët.
Ai më pas zhvilloi një takim me drejtorin e NP Pyjet Nacionale, Zdravko Trajanov, ku u diskutua për menaxhimin e qëndrueshëm të pyjeve dhe rimëkëmbjen e ndërmarrjes e cila, siç u theksua, ka vuajtur nga keqmenaxhimi prej dekadash.
Gjithashtu, në Agjencinë për Mbështetje Financiare në Bujqësi dhe Zhvillim Rural, Hoxha u takua me drejtorin Ilija Stoilev dhe zëvendësdrejtorin Mevlan Morina, ku u shqyrtuan masat konkrete të mbështetjes financiare për bujqit dhe nevoja për procedura më të shpejta dhe më efikase.
Zëvendësministri Hoxha vlerësoi se përmes këtyre bashkëpunimeve të drejtpërdrejta, Ministria e Bujqësisë do të garantojë politika më transparente, më funksionale dhe më të afërta me nevojat reale të qytetarëve dhe bujqve të vendit.
