Kandidati për kryetar të komunës së Çairit, Bujar Osmani, sot mbajti një konferencë për shtyp në qendër të komunës, ku njoftoi iniciativa konkrete për forcimin e bashkëjetesës dhe avancimin e shoqërisë multietnike, si përgjigje ndaj retorikës gjithnjë e më të rrezikshme që po e cenon frymën e Marrëveshjes së Ohrit.
“Jemi këtu sot, në zemër të Çairit, për të dërguar një mesazh të qartë: e ardhmja e komunës sonë dhe e shtetit tonë nuk do të ndërtohet mbi ndarje, por mbi shpresë, bashkëjetesë dhe mundësi të barabarta për të gjithë,” theksoi Osmani, duke nënvizuar se karakteri multietnik i shtetit nuk është dobësi, por forca më e madhe.
“Që nga Marrëveshja e Ohrit e deri më sot, kemi mësuar se kur popujt, komunitetet respektohen, kur të gjithë ndihen të barabartë, atëherë shteti ecën përpara. Kur ky balancë prishet, atëherë humbasim të gjithë,” tha Osmani dhe shtoi se pikërisht Çairi do të jetë bastioni i kësaj bashkëjetese.
Si përgjigje konkrete ndaj sfidave, Osmani njoftoi disa iniciativa kyçe që do të nisin pas 19 tetorit:
“Shtëpia e bashkëjetesës” një qendër e re multikulturore ku të gjitha komunitetet maqedonas, shqiptarë, turq, boshnjakë, romë do të promovojnë kulturën, traditën dhe vlerat e tyre. “Çairi do të bëhet shtëpia e dialogut kulturor dhe miqësisë,” theksoi ai.
Fondi për përfaqësim të barabartë si reagim ndaj shfuqizimit të balancuesit, Osmani do të krijojë një mekanizëm buxhetor që do të sigurojë mundësi të barabarta për të gjithë të rinjtë. “Ky fond do të jetë garanci se përfaqësimi i drejtë nuk është vetëm fjalë, por praktikë e gjallë.”
Drejtoria komunale për gjuhët që do të garantojë përdorimin dhe zhvillimin e të gjitha gjuhëve, pa marrë parasysh përqindjen e përfaqësimit. “Do të garantojë zbatimin e gjuhëve shqipe, maqedonase, turke, boshnjake, dhe natyrshëm do të promovojmë edhe elementet e gjuhës rome.”
Këshilli për bashkëjetesë organ i përhershëm i përbërë nga përfaqësues të të gjitha komuniteteve, i cili do të ndjekë dhe promovojë harmoninë, respektin reciprok dhe tolerancën.
“Dita e Marrëveshjes së Ohrit” Çairi çdo vit do të organizojë ceremoni, debate dhe aktivitete rinore në nder të frymës së Ohrit, si një kujtesë se “barazia dhe bashkëjetesa nuk janë e shkuar, ato janë themelet e së ardhmes sonë.”
Në fjalimin e tij, Osmani theksoi se zgjedhjet nuk janë vetëm për Çairin, por për shoqërinë që do ta lëmë pas.
“Këto zgjedhje nuk janë vetëm për Çairin. Kjo është një betejë për atë se çfarë shoqërie do t’u lëmë fëmijëve tanë. A do të jetë ajo një shoqëri e frikës dhe përjashtimit, apo një shoqëri e barazisë dhe dinjitetit?”
“Ju premtoj: në Çair nuk do të ketë qytetarë të rendit të dytë. Nuk do të ketë humbës. Të gjithë do të jemi fitimtarë në një shoqëri me mundësi të barabarta, respekt të ndërsjellë dhe dinjitet,” përfundoi Osmani, duke njoftuar se Çairi do të bëhet shembull për të ardhmen multietnike të Maqedonisë së Veriut.
