Cilësia e ajrit ambiental në Trubarevë është brenda kufijve të lejuar, informojnë nga Ministria e Mjedisit Jetësor dhe Planifikimit Hapësinor, përmes të dhënave të marra nga stacionet matëse automatike të Universitetit “Goce Dellçev” në Shtip.
Në kumtesë është theksuar se matjet e deritanishme kanë treguar vlera mesatare për koncentrimin e PM₁₀ grimcave që lëvizin brenda kufijve ligjorë të lejuar dhe deri tani nuk është regjistruar tejkalim i pragjeve të përcaktuara.
“Sipas matjeve të bëra për grimcat e pezulluara deri në 10 mikrometra (PM₁₀) koncentrimi mesatar ditor gjatë ditës së djeshme ka qenë 19.7 µg/m³, vlera maksimale e matur ka arritur 39 µg/m³, koncentrimi aktual është 7.5 µg/m³”, thuhet në kumtesë.
Ministria mbetet e përkushtuar për të informuar në mënyrë transparente opinionin dhe për të ndjekur rregullisht gjendjen e cilësisë së ajrit, me qëllim mbrojtjen e mjedisit jetësor dhe shëndetit të qytetarëve.
