Gara për komunën e Strugës po hyn në fazën vendimtare. Përveç kandidatëve tashmë të konfirmuar, i pavaruri Mendi Qyra i mbështetur nga VLEN dhe Arsim Dalipi nga Aleanca Kombëtare për Integrim (AKI), në skenë është futur edhe një emër kontravers: sekretarja e përgjithshme e Levicës, Jovana Mojsovska. Kandidatura e saj, e cilësuar nga opinioni si “befasi”, ka hapur dyshime serioze për prapavijat e saj politike.
Sipas mediave maqedonase, pas këtij plani qëndrojnë lideri i Levicës Dimitar Apasiev, vetë Mojsovska, si dhe Krenar Lloga, i përshkruar si i dërguar i Ali Ahmetit. Në bashkëpunim me Ziadin Selën, ata po tentojnë që Mojsovska të mobilizojë votat maqedonase me moton “Struga përsëri e jona”, për të siguruar balotazhin dhe për të ndaluar një fitore të pastër të kandidatit të mbështetur nga VLEN që në raundin e parë.
Kryeministri Hristijan Mickoski, në një paraqitje televizive, ka reaguar ashpër ndaj këtij skenari:
“Ky është edhe një tentim tjetër për t’i hedhur jelek shpëtimi Ali Ahmetit dhe BDI-së. Nëse realisht duan të garojnë për fitore, pse nuk paraqiten në Veles apo Shtip, ku kanë gjasa reale? Pse pikërisht në Tetovë, Gostivar e Strugë, ku nuk kanë as shanse teorike? Qëllimi është i qartë, të përçahen votat anti-BDI dhe t’i sigurohet mbijetesa BDI-së”, ka deklaruar Mickoski.4news.mk
