Autostrada Shkup–Tetov është një nga zonat më të monitoruara nga sistemi i ri i kamerave rrugore “Qytet i Sigurt”, i cili aktualisht është në fazë testimi. Sipas të dhënave jozyrtare të siguruara nga “Sakamdakazham.mk”, vetëm në disa pika ku janë vendosur kamerat janë regjistruar mbi 100.000 shkelje trafiku në ditë.
Kamerat evidentojnë shpejtësinë e lartë, parakalimin e gabuar dhe kalimin në semafor me dritë të kuqe. Në nivel mujor, kjo shifër arrin rreth tre milionë shkelje, vetëm në pjesë të territorit që përfshin Shkupin, Tetovën dhe autostradat Shkup–Gjevgjeli e Shkup–Tetov.
Ministria e Punëve të Brendshme konfirmon se shifrat janë alarmante dhe thekson se përvoja e vendeve të tjera tregon se pas vënies në funksion të kamerave, numri i shkeljeve bie ndjeshëm, pasi qytetarët kuptojnë se shteti ndëshkon seriozisht.
Nga 1 janari 2026, sistemi do të fillojë të funksionojë zyrtarisht, duke përfshirë edhe gjobitjen. Sipas paralajmërimeve të ministrit Pançe Toshkovski, shkeljet e regjistruara nga kamerat do të sjellin edhe dënime me burg dhe konfiskim të përhershëm të automjeteve. Qëllimi i sistemit nuk është vetëm ndëshkimi, por mbi të gjitha shpëtimi i jetëve njerëzore, sidomos në autostrada ku shënohen më së shumti shkelje dhe aksidente.
Me vendosjen e kamerave në autostradën Shkup–Tetov, si dhe në Korridorin 8 dhe Korridorin 10, pritet një ulje drastike e shkeljeve dhe rritje e sigurisë rrugore në të gjithë vendin.
